Ministrja e Shëndetësisë dhe Mbrojtjes Sociale, Klodiana Spahiu, u njoh nga afër me investimet, funksionimin e shërbimeve dhe punën e stafit në strukturat shëndetësore të Mallakastrës, në kuadër të procesit të ristrukturimit dhe riorganizimit të tyre.

Gjatë vizitës, Spahiu vuri theksin te rëndësia e përshtatjes së organizimit të strukturave shëndetësore me nevojat reale të komunitetit, duke e cilësuar riorganizimin një proces të nevojshëm për garantimin e një shërbimi më efikas dhe më pranë qytetarëve.

“Jemi duke parë nga afër strukturat shëndetësore, mënyrën se si funksionojnë dhe kapacitetet që ato kanë, në mënyrë që riorganizimi i tyre të bazohet në nevojat reale të qytetarëve dhe të komunitetit”, tha Spahiu.

Ministrja theksoi se ristrukturimi nuk lidhet vetëm me organizimin e shërbimeve, por edhe me përshtatjen e strukturës së personelit me kërkesën dhe ngarkesën që kanë institucionet shëndetësore.

“Synimi ynë është që struktura dhe organizimi i personelit t’i përgjigjen në çdo kohë nevojave të qytetarëve, duke garantuar shërbime shëndetësore më cilësore, më të aksesueshme dhe sa më pranë komunitetit”, u shpreh ajo.

Spahiu u njoh gjithashtu me punën e profesionistëve të shëndetësisë dhe kapacitetet aktuale të qendrave shëndetësore, duke vlerësuar rolin e stafit në ofrimin e shërbimeve për banorët e zonës.

Sipas ministres, procesi i riorganizimit synon të krijojë një funksionim më efikas të strukturave shëndetësore, duke marrë në konsideratë karakteristikat e zonës, numrin dhe nevojat e popullsisë, si dhe kapacitetet ekzistuese.

“Çdo ndryshim në organizimin e strukturave duhet të ketë në qendër qytetarin dhe aksesin e tij në shërbimin shëndetësor. Kjo është arsyeja pse po e shohim këtë proces nga afër dhe në kontakt me strukturat dhe stafet në terren”, theksoi Spahiu.

Vizita në Mallakastër është pjesë e punës për ristrukturimin dhe riorganizimin e strukturave shëndetësore, me synim përmirësimin e eficiencës së shërbimeve dhe forcimin e kujdesit shëndetësor pranë komuniteteve.

Burimi ATSH