Këshilli i Ministrave ka propozuar disa shtesa dhe ndryshime në ligjin “Për mbrojtjen e mjedisit”, me synim forcimin e mekanizmave për restaurimin e natyrës, certifikimin e largimit të karbonit dhe mbështetjen financiare të projekteve në fushën e mjedisit.

Projektligji parashikon shtimin e “restaurimit të elementeve të natyrës” si një prej masave për mbrojtjen e mjedisit.

Masat konkrete për restaurimin e natyrës do të miratohen me vendim të Këshillit të Ministrave, me propozimin e ministrit përgjegjës për mjedisin.

Një tjetër risi është parashikimi i certifikatës së largimit të karbonit, e cila do t’u jepet nga ministria personave fizikë dhe juridikë që, gjatë aktivitetit të tyre dhe prodhimit të produkteve, largojnë, mbledhin dhe depozitojnë karbonin në produkte, në përputhje me kriteret e përcaktuara.

Kriteret, procedurat, kërkesat, mënyra e dhënies, përdorimit dhe vlefshmërisë së certifikatës, si dhe funksionimi i komisionit përgjegjës për lëshimin e saj, do të përcaktohen me vendim të Këshillit të Ministrave.

Projektligji riformulon gjithashtu kompetencat e ministrisë përgjegjëse për mjedisin, duke e përcaktuar atë si organ qendror politikëbërës dhe koordinues në fushën e mbrojtjes së mjedisit. Ministria do të ketë ndër të tjera përgjegjësi për hartimin e strategjive dhe planeve kombëtare mjedisore, lëshimin e lejeve, licencave dhe autorizimeve, si dhe mbështetjen financiare të projekteve mjedisore.

Në këtë kuadër, propozohet krijimi i Fondit Kombëtar të Mjedisit në formën e një fondi financiar publik, që do të mbështesë politikën kombëtare të mbrojtjes së mjedisit. Burimet e tij do të jenë buxheti i shtetit dhe financime vendase apo të huaja për këtë qëllim.

Mbështetja financiare nga fondi do të jepet në formën e granteve, subvencioneve ose instrumenteve të tjera financiare për realizimin e projekteve dhe veprimtarive në fushën e mjedisit.

Sipas projektligjit, ministria do të financojë projekte të paraqitura nga organizata jofitimprurëse dhe individë që kanë në objekt të veprimtarisë së tyre fushën e mjedisit, projekte dhe veprimtari me buxhet të konsiderueshëm, si dhe nisma të ideuara e të propozuara nga vetë ministria dhe agjencitë e saj të varësisë.

Skema e financimit mund të mbulojë deri në 100% të kostove të miratuara të projektit.

Projektet do të përzgjidhen nga një komision i përbërë nga pesë nëpunës të administratës publike të nivelit të lartë dhe të mesëm, drejtues të strukturave përgjegjëse për mjedisin. Komisioni do të ketë kompetencë të përzgjedhë dhe klasifikojë projektet, si dhe t’i propozojë ministrit veprimtari e projekte në fushën e mjedisit.

Projektligji parashikon gjithashtu përcaktimin e kritereve dhe procedurave për mbështetjen financiare, ndërsa mënyra e funksionimit të komisionit do të përcaktohet me rregullore të miratuar nga ministri përgjegjës për mjedisin.

Ndryshimet e propozuara parashikojnë që ligji të hyjë në fuqi 15 ditë pas botimit në “Fletoren zyrtare”, ndërsa efektet financiare të tij të fillojnë më 1 janar 2027.

Burimi ATSH