Në Kryegjyshatën Botërore Bektashiane u zhvillua konferenca jubilare me rastin e 35-vjetorit të rihapjes së Kryegjyshatës Bektashiane.

Kryetari i Komunitetit Mysliman të Shqipërisë, Bujar Spahiu, në fjalën e tij përshëndetëse në këtë aktivitet, u shpreh se është kënaqësi dhe nder të jetë i pranishëm në këtë ditë jubilare, për të përcjellë urimet për Kryegjyshatën Botërore Bektashiane.

“Tema e këtij simpoziumi është më shumë se një titull i bukur. Ajo përmbledh një të vërtetë që shoqëria shqiptare e ka kuptuar ndër breza: besimi, kur kuptohet në thelbin e tij, nuk ndërton mure mes njerëzve, por ura; nuk ushqen përçarjen, por respektin”, tha Spahiu.

Ai theksoi se Shqipëria, pavarësisht se është një vend i vogël, ka një përvojë të jashtëzakonshme njerëzore në bashkëjetesën dhe harmoninë ndërfetare.

“Shqipëria është një vend i vogël, por me një përvojë të jashtëzakonshme njerëzore. Dallimet fetare nuk janë shndërruar në arsye për të mohuar njëri-tjetrin, përkundrazi. Shqipëria ka ditur të ndërtojë një hapësirë ku myslimani, bektashiu, katoliku, ortodoksi, ungjillori dhe çdo qytetar tjetër mund të ndihen pjesë e së njëjtës familje shoqërore”, u shpreh ai.

Në përfundim të fjalës së tij, Spahiu nënvizoi rëndësinë e ruajtjes së kësaj harmonie si një vlerë të përbashkët të shoqërisë shqiptare.

“Harmonia ndërfetare është amanet për gjithsecilin prej nesh”, tha kryetari i Komunitetit Mysliman të Shqipërisë.

Konferenca Jubilare mbledh përfaqësues të komunitetit bektashian dhe të komuniteteve të tjera fetare, në një veprimtari kushtuar historisë, trashëgimisë dhe kontributit të Kryegjyshatës Botërore Bektashiane.

Marrë nga ATSH