Nga Himara, ku ka ndjekur që nga mbrëmja e djeshme situatën e krijuar nga zjarri, ministri i Mbrojtjes, Ermal Nufi, deklaroi se situata është totalisht e qetë dhe nën kontroll.

Nufi bëri edhe një bilanc të forcave të angazhuara në operacionin për shuarjen e flakëve, të cilat përfshinë një sipërfaqe të gjerë natën e mbrëmshme.

“Nga Himara një situatë totalisht e qetësuar, një situatë totalisht e menaxhuar. Mbi 170 forca nga Forcat e Armatosura, mbi 300 zjarrfikës, mbi 21 zjarrfikëse kanë qenë në territorin e Himarës. Ndërhyrja nga ajri ka filluar që në orën 6 e gjysmë të mëngjesit”, sqaroi ministri i Mbrojtjes.

Nufi vlerësoi edhe punën e palodhur të forcave që punuan gjatë gjithë natës.

“Është bërë një punë e jashtëzakonshme për të menaxhuar situatën e zjarreve. Kanë qenë gjashtë shtëpi, që fatkeqësisht janë përshkuar nga flakët e zjarrit. Nuk ka pasur humbje në jetë njerëzore, nuk ka pasur dëmtime të bizneseve, falë ndërhyrjes dhe përkushtimit të të gjithë efektivëve, qoftë zjarrfikës, qoftë të Forcave të Armatosura, që kanë luftuar përgjatë gjithë natës, deri në qetësimin e situatës sot në mëngjes”, theksoi ministri Nufi.

881 forca operacionale, 75 automjete zjarrfikëse dhe 340 efektivë të Forcave të Armatosura janë angazhuar gjatë 24 orëve të fundit, me mbështetjen e helikopterëve dhe avionit Air Tractor.

Sot angazhimi vijon me 380 forca ushtarake, 2 helikopterë dhe 1 Air Tractor.
Në Fier dhe Himarë, ku situata ka qenë më e rënduar, rreziku për zonat e banuara është shmangur dhe operacionet vijojnë pa ndërprerje.

Burimi ATSH