Aplikacioni i ri për informacionin mbi tokën, LIS, është tashmë në dispozicion të fermerëve, duke u mundësuar atyre të marrin nga telefoni dhe pa pagesë të dhëna mbi karakteristikat dhe nevojat e tokës së tyre.

Ministri i Bujqësisë dhe Zhvillimit Rural, Andis Salla, gjatë një vizite në Roskovec, ku u takua me një fermer të zonës i cili kultivon 7 dynymë me vreshta, tha se LIS sjell një mënyrë të re dhe më të thjeshtë për aksesin në informacionin mbi tokën.

“Përmes këtij aplikacioni fermerët marrin të gjithë informacionin e nevojshëm për analizat e tokës”, tha Salla, duke theksuar se më parë marrja e këtij informacioni kërkonte udhëtimin drejt Tiranës apo Fushë-Krujës, duke sjellë kohë dhe kosto shtesë për fermerët.

Sipas ministrit, tashmë analiza dhe informacioni mbi tokën mund të aksesohen lehtësisht dhe pa pagesë përmes telefonit. Këto të dhëna u shërbejnë fermerëve për të përcaktuar elementet që i nevojiten tokës dhe për të përdorur në mënyrë më efikase plehrat dhe inputet bujqësore.

LIS synon të ndihmojë fermerët në uljen e shpenzimeve të panevojshme dhe të kostove të prodhimit, si dhe në përmirësimin e rendimentit dhe cilësisë së prodhimit bujqësor.

Burimi ATSH