Kryeministri Edi Rama zhvilloi mbrëmjen e së premtes në Tiranë një takim pune me drejtuesit politikë dhe përfaqësuesit e qeverisë, në kuadër të përgatitjeve për sezonin e ri qeverisës dhe përcaktimit të prioriteteve të punës në territor.

Në fokus të takimit ishte detajimi i programit të sezonit të ri, me theks te forcimi i pranisë së strukturave qeverisëse në territor dhe përmirësimi i shërbimeve publike për qytetarët.

“Vijuam sot punën intensive për detajimin e programit të sezonit të ri, duke nisur nga kalendarizimi i Pranisë Besnike në çdo territor, mekanizmat e rinj të ndërveprimit qeveri-deputetë në funksion të përmirësimit të mëtejshëm të shërbimeve publike qendrore e vendore, si edhe hartimi i ndryshimeve ligjore për PasqyrAlbania”, bëri të ditur Rama.

Sipas kryeministrit, një tjetër çështje e diskutuar ishte progresi në hartimin e nismës së integruar Shqipëria Sociale, e cila synon të konsolidojë ndërhyrjet dhe politikat sociale në funksion të qytetarëve.

Rama njoftoi se kësaj nisme do t’i kushtohet një Konferencë e posaçme Kombëtare në muajin nëntor, ku pritet të prezantohen dhe diskutohen më tej objektivat dhe masat konkrete.

Takimi u fokusua gjithashtu në forcimin e bashkëpunimit mes qeverisë dhe deputetëve, me qëllim koordinimin më të mirë të punës dhe adresimin e nevojave të qytetarëve në territor.

Burimi ATSH