Projekti “GreenElb – Energji e gjelbër dhe e qëndrueshme në ndërtesat e Elbasanit” mblodhi sot në një konferencë përfaqësues të NetZeroCities, bashkive partnere, institucioneve qendrore e vendore, sektorit privat, universiteteve, shoqërisë civile dhe të rinjve të qytetit.

Të pranishëm në këtë konferencë ishin kryetari i Bashkisë Elbasan, Gledian Llatja, Zana Vokopola, drejtore Ekzekutive e Institutit të Kërkimeve Urbane, Ani Hasa, drejtor i Përgjithshëm i Agjencisë për Eficencën e Energjisë, Adelina Farrici, drejtore Ekzekutive e Shoqatës Kombëtare të Bashkive të Shqipërisë, dhe Sissy Windisch, drejtore Operative e Imby SRL dhe anëtare e Bordit të Misionit për Qytete Klimatikisht Neutrale dhe të Zgjuara.

Gjatë konferencës u prezantuan rezultatet e dy viteve të zbatimit të GreenElb, me fokus te rritja e eficencës energjetike, reduktimi i konsumit të energjisë dhe përdorimi i zgjidhjeve të gjelbra në ndërtesa, familje dhe biznese.

GreenElb shërbeu si një projekt pilot për Elbasanin, ndërsa tashmë synimi është replikimi dhe zgjerimi i këtij modeli në të gjithë qytetin, në kuadër të Kontratës Klimatike të Qytetit dhe angazhimit të Elbasanit në Misionin Evropian për 100 Qytete Klimatikisht Neutrale.

Në këtë drejtim, konferenca u fokusua te hapat e ardhshëm, investimet dhe mekanizmat që mund të përshpejtojnë tranzicionin energjetik, si dhe te forcimi i bashkëpunimit mes institucioneve, biznesit, akademisë dhe komunitetit.

Pjesë e aktivitetit ishte edhe Panairi i Eficencës Energjetike, ku u prezantuan teknologji dhe zgjidhje praktike për një përdorim më eficent dhe të qëndrueshëm të energjisë.

GreenElb, i mbështetur nga Bashkimi Evropian përmes NetZeroCities, shënon një tjetër hap në rrugëtimin e Elbasanit drejt neutralitetit klimatik, duke e kthyer angazhimin për një qytet më të gjelbër nga objektiv në veprime konkrete.