Ministri i Mbrojtjes, Ermal Nufi ishte sot në fshatin Tenë të Mirditës, ku pjesa më e madhe e banorëve janë evakuuar për shkak të rrezikut nga zjarret.

Sipas ministrit, situata është përmirësuar gjatë dy orëve të fundit, pas ndërhyrjes së forcave zjarrfikëse dhe dy helikopterëve të Forcave Ajrore. Terreni i thyer e ka bërë të vështirë ndërhyrjen nga toka, ndërsa ndërhyrja nga ajri ka ndihmuar në neutralizimin e rrezikut.

“Në fshatin Tenë në Mirditë kishte një situatë shumë të vështirë para dy orësh konkretisht, me shpërthimin e një vatre zjarri që ishte shumë agresive. Menjëherë kanë ardhur forcat nga bashkia, nga zjarrfikëset vendore dhe është kërkuar edhe ndërhyrja nga ajri. Kemi bërë të mundur që dy helikopterë nga forca ajrore të vinin për të ndërhyrë, pasi për shkak të terrenit të thyer, ndërhyrja nga toka ishte shumë e vështirë. Siç edhe ju e shikoni, duket që situata është nën kontroll. Është situatë e vështirë”, tha Nufi për mediet.

Nufi tha se në Mirditë raportohen çdo ditë rreth dy-tri vatra zjarri, duke ngritur dyshime për mundësinë e zjarrvënieve të qëllimshme. Sipas tij, identifikimi i shkaqeve dhe përgjegjësve është në kompetencë të Policisë.

“Na vjen keq që përballemi me këtë situatë, pasi në Mirditë dëgjojmë që përhapen çdo ditë nga dy-tri vatra zjarri. Është jashtë logjikës njerëzore, por kjo është punë e Policisë pastaj që të identifikojë shkaqet e këtyre zjarreve. Po bëjmë çmos që të mos kemi asnjë dëm në jetë njerëzore dhe banesa”, tha ai.

Ndërkohë, sipas ministrit situatë problematike vijon të jetë në Dukat të Vlorës, ku flakët po përhapen me shpejtësi për shkak të erës së fortë. Në zonë janë angazhuar 105 efektivë të Forcave të Armatosura, ndërsa për shuarjen e zjarrit po përdoren edhe dy avionë “Air Tractor”.

Vatra aktive janë raportuar edhe në Gojan të Pukës, ku zjarri është riaktivizuar në Gojan të Madh. Në këtë zonë janë stacionuar mbi 60 efektivë të Forcave të Armatosura.

“Situata më problematike është në Vlorë, në Dukat. Atje janë 105 efektivë të Forcave të Armatosura. Zjarri po përhapet me shpejtësi. Era na ka penalizuar. Kemi një situatë të vështirë në Gojan të Pukës, për shkak të riaktivizimit të një vatre në Gojan të Madh. Pas Mirditës do të shkojmë edhe në Gojan. Kemi të stacionuar atje mbi 60 efekivë të Forcave të Armatosura”, tha ai.

Ministri bëri të ditur gjithashtu se situatë e vështirë paraqitet edhe në malin e Dajtit dhe në Klos.

Burimi ATSH