Drejtoria e Përgjithshme e Doganave ka intensifikuar monitorimin në pikat doganore gjatë sezonit veror, me synim menaxhimin sa më efikas të flukseve të shtuara të udhëtarëve dhe automjeteve.

Drejtori i Përgjithshëm i Doganave, Besmir Beja, zhvilloi vizita inspektuese në degët doganore Vlorë dhe Kakavijë, ku u njoh me ecurinë e punës, organizimin e shërbimit dhe masat e marra për përballimin e flukseve në hyrje dhe dalje.

Gjatë takimeve me punonjësit doganorë, Beja kërkoi shërbim të shpejtë dhe profesional, duke theksuar se lehtësimi i lëvizjes duhet të shoqërohet me kontrollin e nevojshëm dhe zbatimin korrekt të legjislacionit doganor.

Në fokus ishte edhe respektimi i standardeve të integritetit, transparencës dhe përgjegjshmërisë, si elemente të rëndësishme për forcimin e besimit të qytetarëve dhe komunitetit të biznesit tek administrata doganore.

Sipas njoftimit nga Dogana, monitorimi në terren do të vijojë edhe në pika të tjera doganore, në kuadër të garantimit të një shërbimi më efikas dhe profesional gjatë sezonit të verës.