Kryeministri Edi Rama siguroi sot banorët e Thethit se kjo zonë do të zhvillohet me projekte cilësore, ndërkohë që janë legalizuar të gjitha ndërtimet ekzistuese.

Në një bashkëbisedim me banorët e Thethit mbi Paketën e Maleve, kryeministri Rama sqaroi edhe situatën e disa muajve më parë të prishjeve të ndërtimeve pa leje në Theth.

“Ajo që ndodhi, dhe ju e dini shumë mirë, ishte që mbas vizitës time shpërtheu ndërtimtaria e paligjshme këtu. A thua se u mor leja me idenë që meqë do legalizohen, hajde po futem”, tha Rama.

Sipas tij, u godit zemra e Thethit, kartolina botërore e Thethit.

“Po të shkruash në Google për Thethin, pamja e parë që del është kisha me lëndinën e gjelbër. Lëndina e gjelbër u zaptua, u vendosën me shpejtësi disa shtëpi druri, u rrethua, u shtrua me zhavor dhe u kthye në një plagë mu në mes të Thethit. Si mund t’i lejonim ne këto? Si mund ta lejonim ne që mbasi erdhëm këtu për të kremtuar gjithë heroizmin real ai që keni bërë ju deri kur ne filluam t’ju vijmë në ndihmë, të ndodhnin këto”, tha Rama.

Kryeministri kujtoi se Thethi në qeverisjen e mëparshme nuk kishte rrugë, drita dhe komunikim për muaj të tërë. “Kush rrinte këtu në dimër nuk kishte shans as të dilte as të priste”, shtoi Rama.

Ai i cilësoi të gjithë ata që ndërtuan dhe nuk e braktisën vendin kur në Theth nuk kishte asgjë, si pionerët e zhvillimit të Thethit.

Rama siguroi se tani do të çohet në një nivel tjetër zhvillimi me projekte cilësore, siç po bëhet aktualisht me 11 aplikantët e Paketës së Maleve.

Burimi ATSH