Kryeministri Edi Rama deklaroi se qeveria është e gatshme të rrisë mbështetjen financiare për bizneset e vogla dhe të mesme deri në 1 miliard euro, në kuadër të programit “Dyfisho sipërmarrjen tënde”.

Duke iu drejtuar sipërmarrësve gjatë prezantimit të programit, Rama tha se faza e parë e mbështetjes nis me 250 milionë euro, ndërsa madhësia e financimit në vijim do të përcaktohet nga rezultatet e këtij blloku fillestar.

“Ne jemi gati të shkojmë deri në 1 miliardë euro për sipërmarrjen e vogël dhe të mesme që vijnë nga mbështetja e qeverisë, në mënyrë që askush të mos thotë se nuk ka mbështetje financiare për të bërë planin e tij”, u shpreh Rama.

Kryeministri theksoi se financimi nuk do të jepet automatikisht, por do të bazohet në projekte dhe plane konkrete biznesi, të cilat duhet të vlerësohen dhe miratohen nga institucionet financiare.

“Këto nuk janë para që do të jenë te sporteli i bankës dhe do t’i marrin të gjithë me zarf. Këto janë njësoj si fondet e Bashkimit Evropian, ku mundësia ekziston, por për t’i marrë duhet të plotësohen disa kushte dhe të ndërtohen projekte të besueshme”, tha ai.

Rama bëri të ditur se krahas mbështetjes financiare, qeveria do të ofrojë edhe asistencë për sipërmarrësit në hartimin e planeve të biznesit, në mënyrë që ato të jenë të besueshme për bankat.

Sipas tij, programi synon të krijojë mundësi për çdo sipërmarrës që ka një ide dhe një plan zhvillimi, duke shmangur mungesën e informacionit për instrumentet e reja të financimit.

Kryeministri njoftoi se do të zhvillohet një fushatë e gjerë informimi, ku ministrat do të angazhohen sipas sektorëve për të shpjeguar programin në terren, ndërsa informacioni do të shpërndahet edhe përmes mediave dhe rrjeteve sociale.

“Që kush ka një ide dhe një plan të ulet ta shkruajë, të aplikojë dhe të marrë mbështetjen, deri në 2 milionë euro, me 70% kolateral të garantuar nga qeveria dhe me 2-3% normë interesi”, deklaroi Rama.

Sipas kryeministrit, ky instrument përbën një burim të rëndësishëm mbështetjeje për kompanitë që synojnë të rriten, të zgjerojnë aktivitetin dhe të krijojnë më shumë vlerë në ekonomi.