Ambasadori i Spanjës në Shqipëri, Gabriel Cremades, mori pjesë në një seancë të posaçme të Komisionit Parlamentar për të Drejtat e Njeriut dhe Informimin Publik, e zhvilluar në ish-burgun e Spaçit, një vend, simbol i vuajtjeve të atyre që u përndoqën politikisht gjatë regjimit komunist në Shqipëri.

Aktiviteti, i organizuar nga Kryetarja e Komisionit, Jorida Tabaku dhe Nënkryetarja Iris Luarasi, mblodhi ambasadorë të akredituar në Shqipëri, përfaqësues të shoqërisë civile, përfaqësues politikë dhe familjarë të viktimave të burgut të Spaçit.

“Spanja ka fituar një përvojë të rëndësishme në këtë fushë. Në vitin 2022, Parlamenti spanjoll miratoi Ligjin për Kujtesën Demokratike, i cili zëvendësoi Ligjin për Kujtesën Historike të vitit 2007, duke rikonfirmuar angazhimin e vendit tonë për dinjitetin e viktimave, drejtësinë, dëmshpërblimin dhe garantimin e mos përsëritjes së shkeljeve të tilla.

Është thelbësore që brezat e rinj të njohin historinë dhe vuajtjet që përjetuan kaq shumë njerëz vetëm sepse mbrojtën bindjet dhe lirinë e tyre. Kujtesa nuk i përket vetëm së kaluarës; ajo është një mjet i domosdoshëm për ndërtimin e shoqërive më të drejta, më të lira dhe më demokratike”, shkruan ambasada spanjolle në postimin e saj në rrjetet sociale.