Delegacioni i përhershëm i Kuvendit mori pjesë në Sesionin e 51-të të Asamblesë Parlamentare të Frankofonisë (APF), zhvilluar në datat 7-12 korrik në Yaoundé, Kamerun.

Delegacioni shqiptar u përfaqësua nga kryetarja e delegacionit, Hatixhe Konomi, dhe anëtarët Ilirian Pendavinji dhe Luçiano Boçi.

Në këtë aktivitet të rëndësishëm të diplomacisë parlamentare frankofone morën pjesë mbi 300 parlamentarë, që përfaqësojnë 42 seksione nga parlamentet kombëtare, nënkombëtare dhe ndërparlamentare të hapësirës frankofone.

Punimet e sesionit u zhvilluan në Asamblenë Kombëtare dhe Senatin e Kamerunit, ku u trajtuan një sërë çështjesh me rëndësi për funksionimin e parlamenteve bashkëkohore, ndër të cilat lufta kundër dezinformimit, përgjegjësia etike dhe deontologjike e parlamentarëve, përdorimi i inteligjencës artificiale në veprimtarinë parlamentare, si dhe forcimi i bashkëpunimit ndërmjet parlamenteve frankofone dhe organizatave ndërkombëtare.

Gjatë fjalës së saj, kryetarja e delegacionit shqiptar, Hatixhe Konomi prezantoi zhvillimet kryesore të veprimtarisë së Kuvendit të Shqipërisë gjatë sesionit të fundit parlamentar, duke u ndalur te puna legjislative, reformat e ndërmarra, intensifikimi i diplomacisë parlamentare dhe bashkëpunimi me partnerët ndërkombëtarë.

“Këto forume janë një mundësi e rëndësishme për shkëmbimin e përvojave, diskutimin e praktikave më të mira dhe forcimin e rolit të parlamenteve në mbrojtjen e demokracisë, transparencës dhe shtetit të së drejtës”, u shpreh Konomi.

Sesioni i 51-të i Asamblesë Parlamentare të Frankofonisë shërbeu si një mundësi për forcimin e dialogut ndërparlamentar, shkëmbimin e eksperiencave dhe promovimin e vlerave demokratike mes vendeve pjesëmarrëse.

Burimi ATSH