Kryeministri Edi Rama u shpreh sot, se 25% e aplikimeve të reja për startup-et, nuk janë nga Tirana, por nga bashkitë e tjera të vendit.

Në aktivitetin për prezantimin e programit Rilindja urbane 2.0, Rama tha se sa i takon startup-eve, 75% e aplikimeve janë të përqendruara në Tiranë, ndërsa kërkoi nga bashkitë e tjera të vendit që të bëhet një punë e posaçme në drejtim të përfshirjes së tyre në programet e startup-eve.

“Ne besojmë që pikërisht pse bashkitë e tjera mund të jenë më pak të ekspozuara ndaj gjithë zhvillimeve sesa Tirana mund të jenë pika ku startup-et mund të jenë më shumë, sepse talentet nuk mungojnë në asnjë fshat të Shqipërisë, jo më nëpër qytete”, tha ai.

Kreu i Qeverisë u ndal edhe te një tjetër pikë, të cilën e cilësoi të rëndësishme, siç është edhe fuqizimi i ekonomisë në sensin e fuqizimit të subjekteve vendore nga Shoqatat e Bashkëpunimit Bujqësor (SHBB-të) që po krijohen.

“33 SHBB nuk janë pak, por duhet të kemi shumë akoma, tek programi për mbështetjen e të gjitha bizneseve të vogla dhe të mesme me garancinë sovrane. Programi “Dyfisho biznesin tënd” që do të lançohet dhe do të hapi dyert e bankave për të gjithë ata që duan financim për të dyfishuar kapacitetet e tyre në të gjithë territorin”, vijoi ai.

“Dhe kompania tjetër që do të krijojmë për të mbështetur të gjitha bashkitë, kompani prapë dhe ajo e përbashkët e logjistikës për të çuar në një nivel tjetër mirëmbajtjen e kanaleve ujitëse, mirëmbajtjen e kanaleve kulluese, duke i shpërndarë kapacitetet në mënyrë harmonike dhe me prioritete që vijnë si rezultat i nevojave që ka njëri e tjetri e tjetri, do të jenë dhe ato një vlerë e shtuar”, theksoi Rama.

Rama nënvizoi se po përgatitet një program të ri investimesh për mbrojtjen lumore.

“Programi i ri i investimeve për mbrojtjen lumore; programi i ri i investimeve për përmbylljen e gjithë hartës së ujitjes, ka akoma një pjesë harta e ujitjes që kërkon investime; programi i ri për strehimin, do të kemi së shpejti atë që për të cilin jemi zotuar që këtë mandat do të kemi një qasje tërësisht të re ndaj strehimit, jo vetëm social, por edhe strehimit të përballueshëm. Dhe do të mbështesim fuqimisht çiftet e reja, konkretisht dhe jemi duke punuar për programin i cili dhe ai do të financohet masivisht”, tha Rama.

Në fund, Rama shtoi se nuk mund të lejohet që çështja e anëtarësimit të Shqipërisë në Bashkimin Europian të banalizohet dhe që njerëzit ta ndiejnë këtë si një çështje që nuk lidhet me jetën e tyre të përditshme.

“Prandaj bërja e prekshme e përfitimeve të këtij procesi është detyrë e përbashkët e të gjithëve ne”, përfundoi Rama.

Burimi ATSH