Mbi 41 mijë fermerë kanë aplikuar për të përfituar nga skema kombëtare e mbështetjes në bujqësi për vitin 2026, ndërsa vlera e kërkesave ka tejkaluar 7 miliardë lekë, nga 5,2 miliardë lekë që është fondi i vënë në dispozicion nga qeveria.

Në një intervistë televizive, ministri i Bujqësisë dhe Zhvillimit Rural, Andis Salla, tha se interesi i fermerëve ka qenë më i lartë se pritshmëritë.

“Shifrat paraprake tregojnë se kërkesat e fermerëve kalojnë mbi 7 miliardë lekë”, u shpreh ministri.

Sipas tij, interes të lartë ka pasur edhe në sektorin e blegtorisë, ku aplikimet arrijnë në rreth 3,3 miliardë lekë, si dhe në bletari, ku kërkesat kapin vlerën e 1,1 miliardë lekëve, pas dyfishimit të mbështetjes nga 10 mijë në 20 mijë lekë për koshere.

Ministri nënvizoi gjithashtu se mbi 280 të rinj kanë aplikuar për grantin prej 10 mijë eurosh, një masë që synon të nxisë përfshirjen e të rinjve në sektorin bujqësor.

Lidhur me procesin e përzgjedhjes, ministri bëri të ditur se Agjencia për Zhvillim Bujqësor dhe Rural do të kryejë verifikimin administrativ dhe kontrollin e çdo dosjeje përpara shpalljes së përfituesve.

Në intervistë, Salla u ndal edhe te fondet IPARD III, duke theksuar se Shqipëria ndodhet në fazën përfundimtare të procesit të vlerësimit nga Komisioni Evropian.

“Ne kemi përmbushur të gjitha detyrat që na janë kërkuar dhe presim vlerësimin përfundimtar. Fondet IPARD III prej 148 milionë eurosh janë shumë të rëndësishme për bujqësinë shqiptare dhe jemi gati të hapim menjëherë skemën sapo të marrim miratimin”, deklaroi ministri.

Sa i përket eksporteve bujqësore, Salla theksoi se gjatë gjashtëmujorit të parë të këtij viti është tejkaluar niveli i eksporteve të së njëjtës periudhë të vitit të kaluar, ndërsa në vitin 2025 u eksportuan rreth 380 mijë tonë produkte bujqësore.

Ministri siguroi gjithashtu se nuk janë konstatuar ngarkesa eksporti me pesticide të ndaluara, duke theksuar se rastet sporadike lidhen me mosrespektimin e afateve të skadencës nga fermerë të veçantë dhe jo me përdorimin e produkteve të ndaluara.

Duke folur për çmimet e prodhimeve bujqësore, Salla theksoi se ato përcaktohen nga raporti kërkesë-ofertë, ndërsa ministria, në bashkëpunim me Ministrinë e Financave, po monitoron pikat e grumbullimit për të shmangur abuzimet dhe për të garantuar trajtim të drejtë për fermerët.

Burimi ATSH