Kryetari i Këshillit të Lartë Gjyqësor, Ilir Rusi mori pjesë sot në tryezën e organizuar nga prezenca e OSBE-së në Shqipëri në bashkëpunim me Këshillin e Lartë Gjyqësor, me temë “Komunikimi i Gjykatave me Median”.

Në fjalën e tij, Rusi, theksoi se komunikimi institucional përbën një element të rëndësishëm të administrimit modern të drejtësisë dhe se gjyqtarët e medias kanë një rol të veçantë në garantimin e një komunikimi të saktë, profesional dhe në kohë me publikun, duke respektuar njëkohësisht pavarësinë e gjyqësorit, integritetin e proceseve gjyqësore dhe të drejtat e palëve.

Rusi theksoi se transparenca dhe komunikimi institucional janë pjesë përbërëse e administrimit modern të drejtësisë. Ai vuri në dukje se një komunikim i saktë, profesional dhe në kohë me publikun kontribuon në rritjen e besimit te sistemi gjyqësor, duke garantuar njëkohësisht respektimin e pavarësisë së gjyqësorit dhe integritetit të proceseve gjyqësore.

Kryetari i Këshillit të Lartë Gjyqësor shprehu gjithashtu mirënjohjen për Prezencën e OSBE-së në Shqipëri për mbështetjen e vazhdueshme që i ka ofruar sistemit gjyqësor shqiptar dhe ritheksoi angazhimin e Këshillit për të vijuar bashkëpunimin në nisma që kontribuojnë në rritjen e transparencës, forcimin e komunikimit institucional dhe rritjen e besimit të qytetarëve te drejtësia.

Këshilli i Lartë Gjyqësor theksoi se mbetet i angazhuar për të mbështetur zhvillimin e kapaciteteve profesionale të gjyqtarëve të medias dhe promovimin e praktikave më të mira të komunikimit publik, në përputhje me standardet evropiane të transparencës dhe llogaridhënies institucionale.

Burimi ATSH