Ministri i Bujqësisë dhe Zhvillimit Rural, Andis Salla, së bashku me ministrin e Infrastrukturës dhe Energjisë, Enea Karakaçi, si dhe kryetarin e bashkisë Vau i Dejës, Kristian Shkreli, inspektuan në këtë bashki ecurinë e punimeve për rehabilitimin e kanalit ujitës Shelqet–Pistull, një investim që synon të përmirësojë infrastrukturën e ujitjes dhe të rrisë mbështetjen për fermerët e zonës.

Gjatë inspektimit, ministri Salla u shpreh se projekti është pjesë e investimeve për modernizimin e rrjetit ujitës, me qëllim garantimin e furnizimit të qëndrueshëm me ujë për tokat bujqësore dhe rritjen e eficiencës së sistemeve të ujitjes.

“Punimet përfshijnë rehabilitimin e rreth 5 kilometrave të kanalit, përmes veshjes me beton dhe rikonstruksionit të veprave të artit. Ky investim do të sigurojë furnizimin me ujë të kanaleve sekondare dhe ujitjen e rreth 900 hektarëve tokë bujqësore në fshatrat Shelqet dhe Pistull, në Bashkinë Vau i Dejës”, tha Salla.

Sipas ministrit, përmirësimi i infrastrukturës ujitëse është një element kyç për zhvillimin e bujqësisë, pasi krijon kushte më të mira për rritjen e prodhimit, ul humbjet e ujit dhe rrit qëndrueshmërinë e aktivitetit bujqësor.

Salla theksoi se investimet në kanalet ujitëse dhe kulluese do të vijojnë edhe në zona të tjera të vendit, si pjesë e angazhimit për të modernizuar infrastrukturën bujqësore dhe për të mbështetur zhvillimin e qëndrueshëm të sektorit.

Rehabilitimi i kanalit Shelqet–Pistull pritet të ndikojë drejtpërdrejt në përmirësimin e furnizimit me ujë për fermerët e zonës, duke krijuar kushte më të favorshme për kultivimin e tokave bujqësore dhe rritjen e rendimentit të prodhimit.

Burimi ATSH