Kombëtarja shqiptare ka nisur përgatitjet për dy ndeshjet miqësore ndaj Izraelit dhe Luksemburgut, ndërsa atmosfera në kampin kuqezi duket pozitive në prag të fillimit të një cikli të ri nën drejtimin e trajnerit Rolando Maran.

Në konferencën për shtyp të mbajtur në stadiumin “Air Albania”, sulmuesi Myrto Uzuni dhe mesfushori Juljan Shehu folën për pritshmëritë nga stafi i ri teknik, konkurrencën në skuadër dhe objektivat afatgjata të Kombëtares.

Myrto Uzuni u shpreh optimist për filozofinë e trajnerit të ri, duke theksuar se qasja më ofensive mund të sjellë më shumë gola dhe rezultate pozitive për ekipin.

“Me trajnerin e ri sistemi është ndryshe dhe mund të luajmë më ofensivisht. Në të kaluarën, kur kemi pasur trajnerë me mendësi sulmuese, kemi arritur të shënojmë më shumë gola”, tha Uzuni.

Sulmuesi kuqezi foli edhe për të ardhmen e tij në nivel klubesh, duke konfirmuar se vazhdon të jetë pjesë e Austin në SHBA, megjithëse në janar ka qenë pranë një transferimi që në fund nuk u realizua.

Duke komentuar nisjen e ciklit të ri me Maran, Uzuni vlerësoi nivelin e lartë të grupit, duke theksuar se çdo lojtar ka mundësi të jetë titullar në Kombëtare.

Sa i përket objektivave, ai ishte i qartë: vendi i parë në Nations League dhe kualifikimi në Euro 2028 mbeten synimet kryesore të skuadrës.

“Kur luan për Kombëtaren, gjithmonë duhet të kesh objektiva të mëdha. Duam të dalim të parët në Nations League dhe të sigurojmë pjesëmarrjen në Europian. Kush nuk ka dëshirën për të fituar dhe për të luajtur në Europian, nuk mund të jetë pjesë e këtij ekipi”, u shpreh Uzuni.

Nga ana tjetër, Juljan Shehu u ndal te ndryshimet që sjell ardhja e trajnerit të ri dhe roli i tij në skuadër. Mesfushori theksoi se është i gatshëm të përshtatet me çdo pozicion apo detyrë që do t’i besohet.

“Çdo trajner ka idetë e veta për pozicionimin e lojtarëve. Ende nuk e di nëse do të luaj më përpara apo në të njëjtin rol, por në çdo rast do të jap maksimumin për Kombëtaren”, tha Shehu.

Ai vlerësoi gjithashtu rëndësinë e miqësoreve ndaj Izraelit dhe Luksemburgut, duke i konsideruar si prova të rëndësishme për ndërtimin e identitetit të skuadrës përpara sfidave të Nations League në muajin shtator.

Në fund, Shehu u ndal te konkurrenca në grup, duke theksuar se çdo lojtar që grumbullohet e meriton fanellën kuqezi dhe se gara për një vend në formacion vetëm sa e forcon ekipin.

“Çdo pozicion në Kombëtare është i hapur. Do të luajë ai që e meriton më shumë dhe konkurrenca i bën mirë skuadrës”, përfundoi mesfushori shqiptar.

Burimi ATSH