Fermerët në të gjithë vendin po marrin asistencë pranë zyrave të AREB-ve dhe Agropikave për aplikimin në portalin e-Albania, në kuadër të Skemës Kombëtare të Mbështetjes për vitin 2026.

Ministri i Bujqësisë dhe Zhvillimit Rural, Andis Salla ftoi sot fermerët të aplikojnë për të përfituar nga mbështetja financiare, duke e cilësuar skemën si një mundësi konkrete për të mbështetur prodhimin, investimet dhe zhvillimin e qëndrueshëm të sektorit bujqësor.

Aplikimet janë hapur më 25 maj dhe do të vijojnë deri më 26 qershor përmes portalit e-Albania, ndërsa procesi kryhet pa pagesë dhe pa dokumente shoqëruese.

Skema Kombëtare e Mbështetjes 2026 përfshin 12 masa mbështetëse, të ndara në masa direkte dhe masa investimi.

Masat direkte të mbështetjes përfshijnë tufën bazë të matrikulluar të gjedhit, tufën bazë të matrikulluar të imtave, bletarinë, kontrollin biologjik në serra, fermat organike, certifikimin Global G.A.P, mbështetjen për sipërfaqet e mbjella, si dhe ripopullimin e peshkimit në ujërat e brendshme.

Ndërkohë, masat e investimit parashikojnë mbështetje për fermerët e rinj, ndërtimin dhe rikonstruksionin e stanëve, si dhe mekanizimin e bujqësisë.

Sipas Ministrisë së Bujqësisë dhe Zhvillimit Rural, skema synon të rrisë konkurrueshmërinë e sektorit, të nxisë investimet në fermë dhe të mbështesë fermerët në përmirësimin e kapaciteteve prodhuese dhe standardeve të bujqësisë shqiptare.

Marrë nga ATSH