Ministri i Mbrojtjes, Ermal Nufi deklaroi sot se ende nuk ka një vendim në lidhje me dërgimin e trupave shqiptare në Gaza.

Në daljen për mediet, pas mbledhjes së Qeverisë, i pyetur nga gazetarët, Nufi tha se çështja është ende në fazën e diskutimeve.

“Kemi dërguar një mision vëzhgues në Rripin e Gazës për të parë situatën në terren dhe mundësinë e vendosjes së trupave tona atje. Po diskutojmë me të gjithë partnerët, përfshirë ata amerikanë, për të kuptuar qartë rregullat e sigurisë, detyrat dhe angazhimet”, tha ai.

“Ne kemi besim të plotë te Forcat tona të Armatosura, te njësitë ushtarake, nga repartet speciale te policia ushtarake, që kanë marrë pjesë në të gjitha misionet paqeruajtëse. Jemi të bindur për përgatitjen dhe kapacitetet e tyre. Rajoni është shumë delikat. Ka ekzistuar më parë një mision paqeruajtës në Liban dhe i njëjti model po shqyrtohet edhe për Rripin e Gazës”, shtoi Nufi.

Burimi ATSH