Rolando Maran është trajneri i ri i Kombëtares shqiptare të futbollit.

Presidenti i Federatës Shqiptare e Futbollit (FSHF), Armando Duka prezantoi sot në një konferencë për shtyp trajnerin Maran.

Gjatë konferencës, trajneri Maran tha se e ka ndjekur nga afër Kombëtaren shqiptare duke përcjellë komplimente.

“Më jepet mundësia për të trajnuar një kombëtare që përfaqëson një popull me krenari të madhe. Është krenari e madhe për mua dhe premtimi është për të kërkuar të transferojmë atë dashuri për këtë fanellë, ta transferojmë në fushë, duke vënë të gjithë brendësinë time dhe stafin tim dhe ata që do njoh. Për mua është një impenjim që ndërmarr”, u shpreh Maran.

Duke folur për synimet në krye të Kombëtares shqiptare të futbollit, ai theksoi se ëndrra e tij është të çojë Shqipërinë në botëror, duke e konsideruar këtë edhe si ëndërr të vetë lojtarëve dhe gjithë shqiptarëve.

Maran u ndal edhe te përbërja e skuadrës. “Shumë lojtarë i njoh, se shoh futboll. I kam parë ndeshjet e Shqipërisë, i kam riparë disa prej tyre. Kam folur me ish-trajnerin e kombëtares shqiptare Gianni De Biasi-n, se përveçse është një mik i mirë, është një trajner që e vlerësoj shumë”, theksoi ai.

“Janë kushtet dhe mundësitë për t’ia dalë, nuk do të jetë e lehtë, por ka mundësi. Me ato çfarë ju keni, ne do të bëjmë gjëra më tepër, që në kartë do të jenë më konkurruese. Duhet të arrijmë shumë. Duhet të jemi një grup i bashkuar. Me një grup të bashkuar dhe me pak fat sigurisht kjo gjë mund të arrihet”, tha Maran.

Trajneri i ri i Kombëtares shqiptare ka qenë edhe trajneri i Pisas, Genoas, Cagliarit, Chievos, Catanias, Barit apo Vareses në Itali.

Kjo është hera e parë që Maran do të jetë në stolin e një ekipi kombëtar.

Emërimi i Maran vjen pas vendimit për të mos rinovuar me ish-trajnerin Sylvion Mendes Campos Júnior (Sylvinho) dhe shënon fundin e një prej kapitujve më të bukur të futbollit shqiptar. Braziliani arriti të ndërtonte një skuadër solide, duke na kualifikuar në Europianin e Gjermanisë me një rrugëtim fantastik.

Marrë nga ATSH