Në qytetin e Lushnjës është çelur edicioni i pestë i panairit ndërkombëtar “Ditët e Bujqësisë 2026”, një nga aktivitetet më të rëndësishme për sektorin bujqësor në vend.

Panairi zhvillohet për tre ditë, nga 28 deri më 30 prill, në sheshin qendror të qytetit, ku marrin pjesë mbi 100 fermerë, kompani, ekspertë dhe inovatorë nga Shqipëria, rajoni dhe Europa. Ky aktivitet e kthen Lushnjën në një pikë referimi për prezantimin e zhvillimeve më të fundit në bujqësi.

Në ceremoninë hapëse ishte i pranishëm ministri i Bujqësisë dhe Zhvillimit Rural, Andis Salla, i cili vlerësoi rëndësinë e panairit si një platformë bashkëpunimi dhe zhvillimi për sektorin bujqësor.

“Ky panair është kthyer në një nga aktivitetet më të rëndësishme për bujqësinë në vend. Pjesëmarrja e kompanive nga rajoni dhe Europa krijon mundësi reale për shkëmbim përvojash dhe lidhje kontratash që çojnë produktet shqiptare drejt tregjeve ndërkombëtare”, u shpreh Salla.

Ai theksoi gjithashtu rëndësinë e organizimit të fermerëve përmes Shoqërive të Bashkëpunimit Bujqësor (SHBB), si një model që synon rritjen e prodhimit dhe përmirësimin e cilësisë.

“Së bashku me bashkitë, po punojmë për të shtrirë modelin e SHBB-ve në të gjithë vendin, me synim forcimin e organizimit të fermerëve dhe rritjen e konkurrueshmërisë së sektorit”, tha ministri.

Salla nënvizoi se mbështetja për bujqësinë do të vijojë përmes Skemës Kombëtare dhe paketave financiare, me synimin për ta afruar sektorin me standardet e Bashkimit Europian.

Ministri vlerësoi organizimin e panairit, duke e cilësuar si një aktivitet që i jep vlerë qytetit të Lushnjës dhe potencialit të tij bujqësor, duke kontribuar në zhvillimin ekonomik në nivel vendor dhe rajonal.

Pas ceremonisë së hapjes, e cila u shoqërua me një program artistik, ministri vizitoi stendat e ekspozuesve për t’u njohur nga afër me produktet dhe teknologjitë e prezantuara.

Në panair ekspozohen teknologjitë më të reja në bujqësi, produkte vendase cilësore dhe iniciativa inovative, duke krijuar mundësi konkrete bashkëpunimi dhe zhvillimi biznesi për modernizimin e sektorit.

Në ditën e parë të aktivitetit morën pjesë përfaqësues të institucioneve qendrore dhe vendore, si dhe Kryetarja e Bashkisë së Lushnjës, Eriselda Sefa.