Ministri i Bujqësisë dhe Zhvillimit Rural, Andis Salla vizitoi fabrikën e përpunimit të frutave të thata dhe prodhimit të rakisë “Kaza Frut” në Dibër, një ndër iniciativat kryesore në zonë për rritjen e vlerës së prodhimeve vendase.

Fabrika, e cila prej disa vitesh tregton kumbulla të thata dhe ka hapur linjën e prodhimit të rakisë, shfrytëzon klimën dhe strukturën e tokës së favorshme të Dibrës për të kultivuar kumbulla me cilësi të lartë.

Pronari, Ramazan Kaza, kultivon kumbulla në rreth 2,5 hektarë dhe ka lidhur prodhimin me përpunimin në të njëjtin zinxhir. Përmes produkteve si kumbulla të thata në paketime të ndryshme dhe raki kumbulle e rrushi, kjo linjë përpunimi ka rritur vlerën e prodhimeve të veta dhe shërben gjithashtu si pikë grumbullimi dhe treg për fermerët e tjerë të Dibrës.

Produktet e “Kaza Frut” shkojnë në tregun vendas, duke forcuar ekonominë lokale dhe zinxhirin agroushqimor. Ministri Salla theksoi rëndësinë e mbështetjes së iniciativave të tilla për zhvillimin rural dhe krijimin e mundësive të qëndrueshme për fermerët.

“Zhvillimi i agropërpunimit nuk është thjesht një mundësi për të rritur të ardhurat, por edhe një mënyrë për të përmirësuar cilësinë e prodhimeve vendase dhe për të krijuar vende pune në zonat rurale”, deklaroi ministri.

Drejtuesi i sipërmarrjes, Ramazan Kaza, shprehu gatishmërinë për të zgjeruar linjat e përpunimit dhe për të bashkëpunuar ngushtë me fermerët e zonës, duke krijuar një model të qëndrueshëm bashkëpunimi dhe zhvillimi ekonomik lokal.