Ministrja e Punëve të Brendshme Albana Koçiu u shpreh sot se lufta kundër dhunës digjitale është një betejë e përbashkët që fitohet përmes ndërgjegjësimit, edukimit, respektit e gjuhës që zgjedhim në hapësirën digjitale.

Për ministren Koçiu, “16 ditët e aktivizmit kundër dhunës me bazë gjinore janë absolutisht momenti më i mirë për të kuptuar një të vërtetë shumë të thjesht, që dhuna nuk luftohet dot vetëm”.

“Dhuna në rrjet nuk është ‘shaka’, është një fenomen që dëmton jetë dhe duhet trajtuar e ndëshkuar si i tillë, ndaj po forcojmë mekanizmat mbrojtës në Kodin e ri Penal, nga bullizmi online te përndjekja dhe dhuna psikologjike”, u shpreh ministrja Koçiu.

Por as ligji më i mirë, sipas saj, “nuk mjafton pa ndryshuar kultura”.

“Dhuna digjitale ushqehet nga gjuha që përdorim dhe ajo që tolerojmë online. Duhet ta ritheksoj se kjo nuk është një nga ato beteja që shteti mund ta fitojë i vetëm apo thjesht dhe vetëm përmes rritjes së policimit online”, u shpreh Koçiu.

Sipas Koçiut, “nëse duam ta luftojmë seriozisht nuk mjafton të shtojmë procedimet penale apo të përmirësojmë ligjet. Duhet të ndryshojmë kulturën, gjuhën, sjelljen”.

Në këtë drejtim, Koçiu bëri të ditur se Ministria e Punëve të Brendshme në bashkëpunim edhe me Ministrinë e Arsimit ka dizenjuar programe ndërgjegjësimi dhe sensibilizimi në shkolla, mes tyre edhe për sigurinë në rrjet apo për të njohur të rinjtë me shkeljet që mund të përbëjnë vepra penale.

Marrë nga ATSH