Ministri i Bujqësisë dhe Zhvillimit Rural, Andis Salla bëri të ditur sot se për vitin 2026 sektori bujqësor do të përfitojë një financim historik prej 16,3 miliardë lekësh, niveli më i lartë i dhënë ndonjëherë për bujqësinë dhe zhvillimin rural në vend.

“Projektbuxheti i vitit të ardhshëm rrit mbështetjen për fermerët, përpunuesit dhe peshkatarët me 11,3% krahasuar me vitin 2025, duke i vendosur sektorin në shinat e përgatitjes për anëtarësim në Bashkimin Evropian deri në vitin 2027”, deklaroi ministri Salla në fjalën e tij në Kuvend ku po diskutohet në parim projektbuxheti 2026.

Ministri vuri theksin te rritja e investimeve për zhvillimin e qëndrueshëm të bujqësisë dhe zonave rurale.

“Ky buxhet nuk është thjesht një tabelë shifrash, është një paketë që e çon bujqësinë shqiptare një hap përpara drejt BE-së”, tha Salla.

Ai shtoi se buxheti parashikon investime të rëndësishme në qendra grumbullimi, sisteme digjitale, laboratorë dhe sisteme të informacionit, për të garantuar gjurmueshmërinë dhe sigurinë ushqimore të produkteve.

Sipas ministrit, programi i zhvillimit rural për vitin 2026 përfshin 7,7 miliardë lekë, ose 47,5% të buxhetit total të MBZHR, me fokus te skema kombëtare për pagesa direkte dhe grante investimi, që rritet me 16% krahasuar me vitin 2025.

Ministri theksoi se vetëm kjo masë sipas të dhënave paraprake mbështet fermerët dhe bujqësinë me rreth 1,5 miliardë lekë çdo vit.

Ndër masat e tjera mbështetëse për vitin 2026, ministri nënvizoi kompensimin 10% të TVSH-së për fermerët, Garancinë Sovrane dhe Kredinë e Butë, si dhe investimet në sigurinë ushqimore, ku rritja e fondeve arrin në 80% për laboratorët dhe analizat e akredituara.

Ministri tha se ky program synon të garantojë sigurinë ushqimore, shëndetin dhe mirëqenien e kafshëve dhe bimëve, si dhe të rrisë gjurmueshmërinë e produkteve nga fermat, deri te tregu.

“Peshkimi dhe akuakultura mbeten një prioritet tjetër i buxhetit, me financim 10% më të lartë në vitin 2026, duke u fokusuar në përdorim të përgjegjshëm të burimeve dhe përputhje me politikën e përbashkët të peshkimit të BE-së”, shtoi Salla.

Për infrastrukturën e ujitjes dhe kullimit, tha ai, buxheti parashikon mbi 3,6 miliardë lekë, ose 26,4% më shumë sesa në vitin 2025, duke synuar rritjen e prodhimeve bujqësore dhe menaxhimin e përmbytjeve.

Ministri theksoi edhe rëndësinë e paketës buxhetore për rritjen e formalizimit, gjurmueshmërisë dhe besueshmërisë së zinxhirit prodhim-grumbullim-përpunim.

“Të miratojmë këtë buxhet do të thotë të zgjedhim prodhimin, cilësinë dhe eksportet, të zgjedhim që bujqësia shqiptare të ecë përpara”, deklaroi Salla.

Ky buxhet, sipas ministrit, nuk është vetëm një dokument financiar, por një instrument strategjik që synon të vendosë bujqësinë shqiptare në standardet e Bashkimit Evropian dhe të përgatisë sektorin për fondet pasanëtarësimit në vitin 2030.

Burimi ATSH