Ministri i Bujqësisë dhe Zhvillimit Rural, Andis Salla ndodhet në Vlorë për të koordinuar në terren masat lidhur me paralajmërimin për reshje me intensitet të lartë, që priten të përfshijnë edhe rajonin jugor pas mesnatës.

Gjatë vizitës, ministri u takua me prefektët e Vlorës dhe Fierit, drejtorin e Drejtorisë së Ujësjellës Kanalizimeve Fier dhe strukturat rajonale të ujitje-kullimit, me qëllim koordinimin e detajeve për parandalimin e dëmeve dhe përballimin e situatës emergjente.

Reshjet e dendura kanë nisur në veri, ndërsa pritet që të intensifikohen edhe në rajonin e Vlorës. Salla nënvizoi se të gjitha strukturat janë në gatishmëri të plotë, duke vijuar patrullimet dhe monitorimin e zonave të ndjeshme për përmbytje, dëme në tokat bujqësore dhe infrastrukturë.

Ministri theksoi se bashkëpunimi mes institucioneve qendrore dhe lokale, si dhe me strukturat rajonale të ujitje-kullimit, është kyç për të siguruar mbrojtjen e prodhimeve bujqësore dhe sigurinë e qytetarëve. Ai bëri me dije se janë marrë masa për pastrimin e kanaleve dhe mbajtjen e rrjetit të ujitjes në funksionim të plotë, për të përballuar intensitetin e reshjeve.

Salla u shpreh se situata do të monitorohet në kohë reale dhe qytetarët do të informohen për çdo zhvillim, ndërsa strukturat e emergjencës do të jenë të gatshme për të reaguar në çdo rast.

Ky inspektim vjen në kuadër të masave që po merr qeveria për menaxhimin efikas të situatave të jashtëzakonshme meteorologjike, duke vendosur në fokus sigurinë e jetës dhe pronës së qytetarëve.

Burimi ATSH