Ministri i Bujqësisë dhe Zhvillimit Rural, Andis Salla prezantoi sot në Komisionin e Kuvendit për Bujqësinë, Ushqimin dhe Zhvillimin Rural projektbuxhetin e vitit 2026 për ministrinë që drejton, duke e cilësuar atë si buxhetin më të lartë që ka pasur ndonjëherë bujqësia dhe zhvillimi rural.

Sipas ministrit, buxheti për vitin e ardhshëm do të jetë 16,3 miliardë lekë, ose 11,3% më shumë (rreth 11 milionë euro shtesë) krahasuar me vitin 2025.

“Ky është buxheti më i madh në historinë e sektorit dhe gati tri herë më i lartë se në vitin 2012”, u shpreh Salla, teksa theksoi se rritje të ndjeshme do të kenë: Investimet e brendshme me 32%; Zhvillimi rural me 14,5%; Skemat kombëtare mbështetëse me 16%; Programi i sigurisë ushqimore, me një rritje rreth 80%.”

Sipas tij, projektbuxheti mbështetet në katër shtylla kryesore: Zhvillimi i qëndrueshëm i bujqësisë dhe zonave rurale; Zhvillimi i qëndrueshëm i peshkimit dhe ekonomisë blu;
Siguria ushqimore; Kapacitetet, bashkëpunimi, inovacioni dhe digjitalizimi.

Ministri nënvizoi se do të vijojnë investimet në ujitje, kullim dhe mbrojtje nga përmbytjet, për të rritur sigurinë e fermerëve dhe ulur humbjet.

Salla bëri të ditur se, Programi i Zhvillimit Rural, me 7,7 miliardë lekë, do të përbëjë 47,5% të buxhetit total të ministrisë. Ky program mbështet zbatimin e prioriteteve 2025–2029 dhe përafrimin me Politikën e Përbashkët Bujqësore të BE-së (KAP) deri në vitin 2030.

Për Skemën Kombëtare të Mbështetjes, adresohet një financim prej 5,2 miliardë lekësh për pagesa direkte dhe grante për ferma, agroturizëm dhe përpunim ushqimor, shifër kjo 16% më shumë se buxheti i vitit 2025.

Ministri tha se, vetëm nga thirrja e fundit për investime, janë regjistruar mbi 800 aplikime, që do të vazhdojnë të zbatohen edhe gjatë vitit 2026, duke sjellë të paktën 2 miliardë lekë investime në modernizimin e sektorit, ose 27% më shumë se një vit më parë.

Gjithashtu theksoi Salla, një risi e projektbuxhetit është kompensimi 10% i TVSH-së për inputet bujqësore, i lidhur me shitjet me faturë për çdo fermer me NIPT.

“Në praktikë, 10% e vlerës së faturës i kthehet fermerit si kompensim mbi produktin e shitur”, shpjegoi Salla, duke theksuar se kjo masë do të ulë kostot e prodhimit, do të rrisë gjurmueshmërinë dhe sigurinë ushqimore.

Sipas tij, vetëm kjo masë do të mbështesë fermerët me rreth 1,5 miliardë lekë në vit.
“Ndërtojmë një qasje të re për fermerët mbi parimin: faturo dhe përfito”, u shpreh ministri Salla, duke theksuar se këto masa janë thelbësore për përgatitjen e sektorit në procesin e anëtarësimit në Bashkimin Europian.

Burimi ATSH