Forcimi i bashkëpunimit mes Shqipërisë dhe Egjiptit në fushën e turizmit kulturor, si dhe shkëmbimi i përvojave në menaxhimin e trashëgimisë kulturore dhe muzeale ishte në qendër të takimit të ministrit të Turizmit, Kulturës dhe Sportit, Blendi Gonxhja dhe ministrit të Turizmit dhe Antikitetit të Egjiptit, Sherif Fathi Attia.

Ky takim u zhvillua sot gjatë qëndrimit në Riad ku dy ministrat morën pjesë në Asamblenë e 26-të të Përgjithshme të UN Tourism.

Ministri Gonxhja përmes një postimi në rrjetet sociale tha se “ky takim miqësor forcon lidhjet mes dy vendeve tona dhe hap perspektiva të reja për bashkëpunim në promovimin e trashëgimisë dhe destinacioneve kulturore në nivel ndërkombëtar”.

“Shpreha vlerësimin për hapjen e muzeut të ri të Egjiptit, një shembull i shkëlqyer i ndërthurjes së historisë me inovacionin, si dhe e përgëzova për zgjedhjen e drejtorit të ri të UNESCO-s, Dr. Khaled El-Enany, me origjinë egjiptiane, një arritje që nderon gjithë rajonin”, tha Gonxhja.

Më herët ministri Gonxhja u takua edhe me homologun kroat, Tonči Glavina, me të cilin ndanë një vizion të përbashkët për zhvillimin e turizmit dhe shkëmbimeve kulturore e sportive.

Burimi ATSH