Ambasada britanike në Tiranë reagoi sot lidhur me miratimin e ligjit për barazinë gjinore dhe deklaratat e kreut të Partisë Demokratike, Sali Berisha ndaj ambasadorit të Bashkimit Evropian në Tiranë, Silvio Gonzato.

“Barazia gjinore dhe mosdiskriminimi nuk janë të negociueshme. Ato janë të drejta themelore të njeriut dhe vlera universale që mbështesin shoqëritë demokratike”, thekson ambasada britanike në një reagim.

“Mbretëria e Bashkuar është e gatshme të mbështesë Shqipërinë në përpjekjet e saj për të avancuar barazinë, dinjitetin dhe parimet demokratike. Në një shoqëri të përkushtuar ndaj këtyre vlerave nuk ka vend për sulme ndaj ambasadorëve”, nënvizon ambasada.

Dje reagoi edhe Komisionerja për Zgjerimin në Bashkimin Europian, Marta Kos, për deklaratat e kryetarit të Partisë Demokratike, Sali Berisha ndaj ambasadorit të Bashkimit Europian në Tiranë, Silvio Gonzato, lidhur me orientimin e tij seksual.

Kos u shpreh se sulme të tilla janë të papranueshme.

Dje në Kuvend, kreu i PD-së Sali Berisha tha se ambasadori i Bashkimit Europian në Tiranë, Silvio Gonzato ka kërkuar votimin e projektligjit “Për barazinë gjinore”, por nuk mund t’i imponojë shoqërisë shqiptare bindjet e tij personale.

Burimi ATSH