Ministri i Financave, Petrit Malaj zhvilloi sot një takim me drejtorin e KfW për Evropën Juglindore dhe Turqinë, Klaus Mueller, ambasadorin gjerman në vendin tonë, Karlfried Bergner dhe drejtuesin e Bashkëpunimit Gjerman, Iven Schad, për të riafirmuar partneritetin e ngushtë mes Shqipërisë dhe Gjermanisë në fushën e zhvillimit të qëndrueshëm.

Diskutimet u përqendruan në projektet strategjike në sektorë prioritar si transporti, furnizimi me ujë të pijshëm, turizmi, si edhe programet e mbështetjes për klimën dhe eficiencën energjetike.

“Veçanërisht u theksua rëndësia e projektit për rikonstruksionin e hidrocentralit të Fierzës, si një nga investimet më të rëndësishme në sektorin energjetik”, bëri të ditur ministri Malaj.

Përmes këtij bashkëpunimi, disa bashki në vend kanë përfituar investime konkrete në përmirësimin e infrastrukturës, duke kontribuar në zbutjen e varfërisë dhe nxitjen e zhvillimit të qëndrueshëm për komunitetet lokale.

Ky takim konfirmon rolin kyç të bashkëpunimit dypalësh Shqipëri-Gjermani në forcimin e kapaciteteve vendore dhe përshpejtimin e reformave drejt një zhvillimi më gjithëpërfshirës dhe miqësor me mjedisin.

Burimi ATSH