Kryeministri Edi Rama bëri të ditur sot se referuar një studimi të Institutit të Ekonomisë dhe Shkencave Politike në Londër, kontrolli bazë shëndetësor Check-Up në Shqipëri ka rritur me 2,5 vite jetëgjatësinë e shqiptarëve.

I ftuar në një studio televizive, kryeministri foli mbi investimet në shëndetësi, duke u ndalur te koncesioni i Check-Up.

“Studimi i tyre thotë që Check-up ka ulur vdekshmërinë në popullsinë shqiptare me 2.5 vjet, ose ka rritur jetëgjatësinë. Bëhet fjalë për atë Check-up-in “e korruptuar”. Nuk mund të gjykosh një politikë dhe produkt sepse dikush, që kishte akses në produkt, fut dorën”, u shpreh Rama.

Ndërkohë, kryeministri theksoi se po kryhet një transformim i jashtëzakonshëm i spitalit Onkologjik falë një marrëveshjeje me spitalin e tetë më të mirë në botë, “Sheba” të Izraelit.

Duke folur edhe për partneritetin me qendrën spitalore universitare të ekselencës evropiane “San Raffaele” dhe universitetit përkatës “Vita – Salute San Raffaele”, Rama theksoi se plani është që të bëjmë QSUT-në një spital ekselence për gjithë rajonin.

Kryeministri i konsideroi koncesionet në shëndetësi suksesin më të madh, Rama theksoi se “nga pikëpamja e sistemit shëndetësor janë supersukses pasi kanë ulur infeksionet postoperatore”.

Ndërkohë lidhur me proceset hetimore në SPAK ndaj koncesioneve në shëndetësi, Rama tha se SPAK është aty për të luftuar korrupsionin jo për të marrë vendime se çfarë duhet të bëjë qeveria, me privat apo me shtet. “Nëse në përmbajtje një proces ka një moment korruptiv, momenti korruptiv ndëshkohet, por jo i gjithë procesi dhe produkti”, shtoi Rama.