Ambasadori i Bashkimit Evropian, Silvio Gonzato deklaroi sot se, lajmi se Delegacioni i Bashkimit Evropian në Tiranë ka ndërhyrë tek ODIHR-i në raportin e tij është totalisht gënjeshtër.

Në një prononcim për mediet pas një takimi me Komisionerin Shtetëror të Zgjedhjeve, Ilirjan Celibashi, Gonzato u shpreh se, “Bashkimi Evropian as nuk ndërhyn, as nuk manipulon”.

“Lajmi se ne kemi ndërhyrë tek ODIHR-i në raportin e tij është totalisht gënjeshtër. ODIHR-i është i pavarur dhe vepron i pavarur dhe ne as nuk mund të ndërhyjmë në raportet e tyre”, tha Gonzato.

“Erdha për të takuar z. Celibashi, për të pasur një përditësim sesi po shkon procesi”, shtoi Gonzato.

I pyetur lidhur me pastrimin e parave në Shqipëri dhe nëse mund të ndikojnë paratë e krimit të organizuar në zgjedhje, Gonzato u shpreh se, “ne besojmë tek ODIHR-i, është këtu për të monitoruar të gjithë procesin zgjedhor. Lufta kundër krimit dhe korrupsionit është pjesë e negociatave me BE-në dhe ne vlerësojmë punën që po bën SPAK”.

I pyetur nëse reagimi i djeshëm ishte për Partinë Demokratike, Gonzato u shpreh se, “jo nuk ishte për asnjë. Ishte një deklaratë për të treguar se ne mbështesim Shqipërinë, për ta shoqëruar, nuk jemi këtu për të ndërhyrë tek procesi, nuk jemi këtu për të manipuluar asgjë. Isha pak i shokuar pasi pashë atë dhe ndjeva se duhet të reagoja. Nuk targetuam asnjë, targetuam vetëm atë informacion”.

Gonzato tha se, “kemi shprehur shpresat që parlamenti do të adoptojë të gjithë rekomandimet e ODIH-it, përfshirë financimet e fushatës elektorale, përfshirë çështjet e shpifjeve dhe që përfshijnë aspekte të tjera të procesit zgjedhor. Besojmë se këto do të adresohen shumë shpejt nga parlamenti i ri sepse janë çështje të rëndësishme”.

Burimi ATSH