Kryetari i Partisë Demokratike, Sali Berisha siguroi sot se “pensionet do rriten me 20 për qind dhe do indeksohen dyfishin e inflacionit.

Në një konferencë me Sindikatat e Bashkuara, Berisha theksoi po ashtu se “nuk do mund të ketë rrogë të ulët nën 500 euro”.

“Ne luftojmë shumë për një klimë miqësore për biznesin dhe unë garantoj çdo sipërmarrës se ky imponim ligjor i qeverisë do shoqërohet me lehtësira të mëdha fiskale në mënyrë që ata përsëri të kenë fitimin që meritojnë, të investojnë, të punësojnë dhe të zgjerojnë punën e tyre. Por rrogë nën 500 euro nuk mund të ketë”, tha ai.

Po ashtu, Berisha premtoi vendosjen e pagës për orë pune. “Ne do ecim në rrugën që ecin vendet e lira. Vendet e lira nuk ecin në rrugën e shfrytëzimit të egër, ecin në rrugën e përhapjes së mirëqenies, rritjes së nivelit të jetesës së tyre”, shtoi ai.

Duke folur për pensionsitët, Berisha tha se ata do kenë kartën e konsumatorit.

“Karta e konsumatorit parashikon që ata të marrin 20 përqindëshin që paguajnë si TVSH çdo 6 muaj, dmth do marrin rreth 450 euro në vit zbritje të çmimeve të ushqimeve dhe gjërat bazë. I garantoj pensionistët dhe të gjithë të moshuarit se lista e rimbursimeve do jetë identike me Italinë. Do merret lista e rimbursimeve që Italia ka për qytetarët e vet dhe ne do e vendosim këtu. Ne nuk jemi si Italia, por për ilaçet do të jemi ne se ilaçet nuk janë luks”, shtoi ai.

Berisha tha po ashtu se do të zbatohet përgjysmimi i çmimit në të gjitha udhëtimet ndërurbane të pensionistëve.

“Nuk mund të lësh kurrë ti atë që ka punuar gjithë jetën dhe t’i thuash tani se ky fondi i pensioneve këtu është keqmenaxhuar nga qeveritë, nuk më lë mua të rris pensionet. Ky është mashtrim publik. Se vërtet ky fondi nuk i ka paratë për t’i rritur, por nga buxheti mund të çosh paratë për të rritur këtë fondin”, tha ai.

Marrë nga ATSH