Kryeministri, njëherësh kryetari i Partisë Socialiste, Edi Rama ishte sot në Lezhë me të rinjtë, ku prezantoi kandidatët për deputetë në zgjedhjet e 11 majit.

Në fjalën e tij Rama foli edhe për mandatin e 4-t.

“Kjo e fundit ishte tërësisht e Ulsiut (Manjës), e mandatit të 5-të. Jo se nuk do të marrë PS mandatin e 5-të, por për pjesën time nuk flet Ulsiu, flas vetë. Edhe duhet sqaruar kjo, se Ulsiu edhe ministër drejtësie po, prokuror po, nga Dibra po dhe thonë njerëzit duhet të dijë ndonjë gjë ky, por nuk di gjë”, u shpreh Rama.

Rama vlerësoi edhe sallën ku u mbajt takimi i sotëm, duke u shprehur se është në lartësinë të ambicies së kryebashkiakut Pjerin Ndreu.

Më pas Rama foli për atë që e cilësoi si “kryetema dhe kryefjala” e 11 majit, që është Shqipëria në Bashkimin Evropian.

Rama u shpreh se është zgjedhur të bëhen këto takime me të rinjtë, sepse përfituesit më të mëdhenj të Shqipërisë në BE do të jenë pikërisht të rinjtë.

“Bashkë me bashkëmoshatarët tuaj duhet të angazhoheni fuqimisht që në 11 maj masivisht votuesit e parë, masivisht votuesit e rinj të mbështesin negociatat për anëtarësim të Shqipërisë në BE dhe mbështesin planin tonë shumë ambicioz të mbylljes së negociatave në fund të 2027-ës, në mënyrë që të anëtarësojmë Shqipërinë në BE brenda kësaj dekade”, tha Rama.

Burimi ATSH