“Do të lançojmë një tjetër konkurs të madh ndërkombëtar për një park të madh të besimit, të cilin e kemi konceptuar së bashku me Presidentin e Emirateve të Bashkuara, Mohamed bin Zayed Al Nahyan”.

Kështu deklaroi sot kryeministri Edi Rama në aktivitetin “Tirana, Kryeqyteti Mesdhetar i Kulturës dhe Dialogut 2025”.

“Parku i madh i besimit është një ide që është tanimë e kahershme , por i ka ardhur koha për t’u realizuar. Falë bashkëpunimit me Presidentin dhe qeverinë e Emirateve të Bashkuara, ne do ta nisim me këtë konkurs. Kemi përcaktuar edhe territorin, i cili do të jetë diku në periferi të kryeqytetit, një park i madh që do të jetë një hapësirë për të gjithë besimtarë ose jo besimtarë dhe që do të referojë përmes natyrës, luleve, bimëve, pemëve, frutave ato që janë burimet e besimeve të ndryshme”, tha Rama.

Kreu i qeverisë u shpreh se “do të jetë një park ku vizitorët do të gjejnë të gjitha bimët, lulet, frutat apo perimet që përmenden në librat e shenjtë dhe aty do të mund të shohin se sa shumë janë gjërat që tregojnë se në fund të ditës mund t’i vëmë Zotit emra të ndryshëm, mund të zgjedhim të besojmë apo të mos besojmë në një Zot të caktuar me një emër të caktuar, por jemi të gjithë fëmijë në një univers dhe të gjitha çfarë na ndajnë mes veti janë prodhimi ynë dhe nuk janë zgjedhje apo aq më pak një ndëshkim që na vjen nga lart apo që na vjen nga natyra”.

Burimi ATSH