Kryetarja e Delegacionit të Përhershëm të Kuvendit të Shqipërisë në Asamblenë Parlamentare të Mesdheut (PAM), Klodiana Spahiu dhe deputeti Laert Duraj, anëtar i delegacionit kanë marrë pjesë në Sesionin Plenar të 19-të të PAM, i cili u zhvillua gjatë datave 20-21 shkurt në Romë, Itali.

Përgjatë punimeve të ditës së parë u zhvilluan votimet për zgjedhjen e Presidentit të ri të PAM, Giulio Centemero dhe anëtarësisë së Byrosë së Asamblesë, të mandatuar për periudhën 2025-2027.

“Diskutimet e ditës së parë theksuan rolin dhe misionin e kahershëm që ka Asambleja Parlamentare e Mesdheut për arritjen e paqes dhe prosperitetit, mbrojtjen e të drejtave të njeriut dhe në veçanti, u theksua se politika duhet të ndjekë drejtësinë, një komponent thelbësor i paqes, ndërsa lufton kundër shtypjes së saj”, thuhet në njoftimin e Kuvendit.

Deputetja Spahiu gjatë fjalës së saj vlerësoi mbështetjen e vazhdueshme të vendeve anëtare të BE-së brenda PAM për Shqipërinë në rrugëtimin drejt integrimit europian, si dhe theksoi rëndësinë e bashkëpunimit mes parlamenteve për të kontribuar në forcimin e bashkëpunimi ekonomik, politik, arsimor dhe kulturor mes vendeve të Mesdheut.

“Nuk besoj se ka një organizatë tjetër rajonale që bashkon parlamente të shteteve të tre kontinenteve dhe popujve të kaq shumë kulturave, qytetërimeve, gjuhëve dhe pasurive shpirtërore që lulëzojnë këtu në Mesdhe, në djepin e kulturës botërore. Lehtësimi i dialogut midis qytetërimeve, respektimi i të drejtave të njeriut, bashkëpunimi ekonomik, social e mjedisor si edhe në fushën e sigurisë, për të cilat po diskutojmë në këtë sesion, përbëjnë çështje themelore jo vetëm për rajonin e Mesdheut, por edhe për kontinentet që bashkohen në këtë rajon”, u shpreh Spahiu.

Sipas njoftimit të Kuvendit, gjatë ditës së dytë të takimit u miratuan rezolutat e Komisionit mbi Politikat dhe Bashkëpunimit mbi Sigurinë, si dhe u vlerësua fakti që PAM në dhjetor të vitit 2024, mori Presidencën e Mekanizmit Koordinues për Asambletë Parlamentare kundër Terrorizmit në Organizatën e Kombeve të Bashkuara, si dhe u vlerësuan inisiativat që PAM ka zbatuar dhe do të trajtojë këto fenomene, me mbështetjen e partnerëve të saj strategjikë rajonalë dhe ndërkombëtarë.