Kryeministri Edi Rama deklaroi sot nga Madridi, se Shqipëria nuk ka një plan “B” përkundrejt Bashkimit Europian.

Në fjalën e mbajtur pas ceremonisë së nënshkrimit të marrëveshjes për mbajtjen në Shqipëri të Kongresit Botëror të Ligjit, në vitin 2027, Rama tha se nëse ne do të kishte një plan “B” përkundrejt lirisë individuale, shtetit të së drejtës dhe demokracisë, qytetarët do ishin të detyruar të jetonin në një shoqëri të kategorisë “B”.

“Unë përgjigjem bindshëm që: Nuk ka plan “B”! Nëse kemi plan “B” kundrejt këtyre të trijave do të jesh i dënuar të jetosh në një shoqëri të kategorisë “B”. Ne duam një vend ku të gjithëve iu jepet mundësia të fitojnë dhe ku askush nuk mund të fitojë në kurriz të dikujt tjetër. Kjo ndodh nëse ne zbatojmë liritë individuale, shtetin e së drejtës dhe demokracinë“, deklaroi ai.

Kryeministri theksoi se ekziston vetëm një plan “A”, integrimi në familjen europiane.

“Ka shumë tundime në pjesën perëndimore të Europës, për largimin nga BE, mbyllljen e kufinjve, kthimin e kufinjve të vjetër doganor. Shpesh më pyesin cili është plani “B”, duke qenë se plani “A” është BE”, u shpreh Rama.

Burimi ATSH