Kryeministri Edi Rama u shpreh sot se vota për Partinë Socialiste është e vetmja votë për ndryshimin, ndërsa vota për të tjerët është një votë e sigurt për zhgënjimin.

Gjatë punimeve të Kuvendit Kombëtar Rinor për Shqipërinë 2030, Rama u shpreh se “gjithë të tjerët premtojnë çdo gjë, sepse nuk kanë asnjë gjë në dorë.

“Ndërsa ne premtojmë atë që bëjmë dhe kemi në dorë të bëjmë atë që premtojmë”, shtoi ai.

“Të gjithë ta dinë mirë se kjo nuk është koha për të luajtur me fatin e Shqipërisë duke e djegur votën në oxhakun gjithë blozë të një partie të vjetër, apo në mangallën e disa partiçkave të reja që të vetmen gjë të re kanë moshën e drejtuesve të tyre”, tha Rama.

Kryeministri theksoi se kjo është koha kur kur shqiptarët duhet ta përdorin votën për Shqipërinë 2030, për Shqipërinë Europë të Ballkanit dhe pjesë të pandashme të Europës së bashkuar.

“Koha kur të gjithë duhet ta dinë se për ta arritur Shqipërinë 2030 me flamurin e Skënderbeut dhe të Ismail Qemalit në rreshtin e flamujve të BE-së ka vetëm një tren për të gjithë, Partia Socialiste e Shqipërisë”, tha Rama.

Rama tha se “kjo është e vetmja forcë politike e shqiptarëve që ka moshën e të gjithë atyre që e mbështesin dhe që ka bërë dhe mund të bëjë akoma më shumë se të gjitha forcat e tjera së bashku për Shqipërinë dhe të gjithë ata që e mbështesin që jo rastësisht janë shumica dërrmuese e shqiptarëve”.

“Asnjë forcë tjetër nuk është më e vjetër se sa kjo e jona, asnjë forcë tjetër nuk është më e re se sa kjo e jona. Asnjë forcë tjetër nuk ka më shumë eksperiencë se sa kjo e jona, nuk ka më shumë energji se sa kjo e jona. Asnjë forcë tjetër, e vjetër apo e re, nuk ka më shumë rini se sa ne dhe në asnjë forcë tjetër tjetër nuk ka vend për të rinj dhe vjetër sa ka tek ne”, tha Rama.

Kryeministri theksoi se tek asnjë forcë tjetër vota nuk sjell asgjë të re për ata që zgjedhin sepse fuqia që i sjell të rejat për vendin dhe njerëzit nuk është askund tjetër përveçse këtu tek PS.

Burimi ATSH