Në 11 maj do të kemi një fletë votimi që përmban të gjithë emrat e kandidatëve, të të gjitha partive. Ata nuk do të identifikohen me numra siç ndodhi në vitin 2021.

Sekretari për Çështjet Zgjedhore në Partinë Socialiste, Damian Gjiknuri tha sot se do të veprohet siç e parashikon Kodi Zgjedhor.

“Kodi Zgjedhor nuk njeh më numra, numra do të kenë vetëm partitë, por jo kandidatët. Renditja do të bëhet sipas alfabetit dhe kjo është një histori e mbyllur, krahasuar me herën e fundit që dolën shumë fleta të pavlefshme”, thotë Damian Gjiknuri Sekretar për Çështjet Zgjedhore, PS.

Report TV ka mësuar se edhe KQZ, e mbështet këtë model.

“Varet si do ta bëjë kompozimin KQZ-ja të fletës së votimit. Mirë është që zgjedhësit ta dinë se kush janë kandidatët, dhe edhe nëse bëhet ndonjë gabim, dhe vendoset votë parapëlqyese tek lista e mbyllur që nuk duhet, prapë vota nuk del e pavlefshme sepse llogaritet si votë brenda shportës së partisë”, shprehet Gjiknuri.

Në qarqe të mëdha, si ai i Tiranës, fleta e votimit në këtë formë do të jetë e komplikuar.

“Do të jetë pak e komplikuar në Tiranë, po nuk kemi çfarë të bëjmë, ndaj ne deshëm votim elektronik në Tiranë, se kjo e zgjidhte këtë punë, por opozita nuk pranoi”, thekson Damian Gjiknuri, Sekretar për Çështjet Zgjedhore në PS.

Burimi ATSH