Në Ditën Ndërkombëtare të Arsimit, Programi i Kombeve të Bashkuara për Zhvillim në Shqipëri, publikoi rezultatet e deritanishme në bashkëpunim me partnerët ndërkombëtarë, kombëtarë dhe lokalë për rindërtimin apo riparimin e objekteve arsimore të dëmtuara nga tërmeti shkatërrimtar i 26 nëntorit 2019.

Programi “EU4Schools”, i financuar nga Bashkimi Europian me 75 milionë euro dhe i zbatuar nga UNDP në Shqipëri, po mbështet rindërtimin dhe/ose riparimin e 63 objekteve arsimore në 11 bashkitë më të prekura nga tërmeti, duke përfshirë çerdhe, kopshte, shkolla dhe konvikte. Rreth 25000 nxënës, fëmijë e mësues janë përfitues të drejtpërdrejtë nga ky projekt.

Deri tani, në kontekstin e “EU4Schools” kanë përfunduar 59 objekte arsimore që ofrojnë kushte dhe standardet më të mira për fëmijët dhe mësuesit.

Sipas PNUD, nëpërmjet projektit “Mbështetja kroate për rimëkëmbjen e arsimit” (CERS), i financuar nga qeveria kroate dhe i zbatuar nga UNDP në Shqipëri, është rindërtuar nga e para shkolla 9-vjeçare & kopshti “Iliria” në Fushë-Krujë, si dhe është mundësuar pajisja me mjetet më të fundit teknologjike të tetë laboratorëve të TIK në gjashtë bashki të ndryshme të vendit.

Ndërkohë, falë projektit “Mbështetja për Infrastrukturën Komunitare” (CIS), me financim nga qeveritë e Danimarkës 🇩🇰 dhe British Embassy Tirana, me bashkëfinancim gjithashtu të Bashkia Durres dhe zbatim nga UNDP në Shqipëri, janë rindërtuar ose riparuar tre objekte të ndryshme arsimore, pjesë e bashkisë Durrës: Shkolla 9-vjeçare “Zyber Sallaku” Manzë, Durrës; Kopshti “Isuf Ferra” dhe palestra e shkollës në Shkozet, Durrës; Shkolla e mesme e bashkuar “Jusuf Hoti” dhe kopshti i ri në Katund të Ri, Durrës.

Investimi në arsim është gjithmonë investimi më i mirë për të ardhmen. Në këtë aspekt, kemi hedhur gurthemelë të rëndësishëm për të ardhmen e brezave të rinj të Shqipërisë, shprehet PNUD.