Në Platformën Kombëtare të Punësimit, puna.gov.al, i krijuar për të mbështetur tregun shqiptar të punës, janë ofruar tashmë 5000 vende pune në të gjitha qytetet e Shqipërisë.

Tashmë çdo punëkërkues plotëson online dosjen respektive dhe çdokush gjen punën më të mirë të mundshme apo kandidatin më të mirë për një vend pune përmes “puna.gov.al”.

Kryeministri Edi Rama ndau sot në rrjetet sociale një videoinformacion më të zgjeruar mbi këtë platformën, ku çdo muaj shpallen vende të lira pune.

Po ashtu, Rama tha se përmes portalit të interesuarit, qofshin këta punëkërkues të papunë apo migrantë, mund të regjistrohen në kurse formimi profesional.

Platforma shërben po ashtu dhe për punëdhënësit, të cilët mund të publikojnë vendet e lira të punës për të gjetur punëkërkuesit e duhur.

Platforma ofron informacion mbi vendet e lira të punës në Shqipëri, ku ndërmarrjet hoteliere, industria nxjerrëse, prodhimet artizanale, arsimi dhe formimi profesional, industria ushqimore, administrata publike dhe ndërtimi janë edhe sektorët që kanë më tepër kërkesa për punësim.

Aksesi në platformë realizohet duke vendosur të njëjtat kredenciale si në portalin “e-Albania”.

Në 2024-ën, papunësia zbriti në nivelin më të ulët historik, prej 10,7%.

Për 2025-ën parashikohet të ketë një normë papunësie njëshifrore në masën 9,8%. Kjo është hera e parë në tri dekadat e fundit që Shqipëria do të ketë një normë papunësie njëshifrore.

Burimi ATSH