Qendra për Hapje dhe Dialog (COD) ka zhvilluar aktivitetin letrar “Magjia e fjalës poetike” në qytetin e Vlorës. Kësaj here COD-i kishte ftuar poeten vlonjate Lela Qejvani.

Në aktivitet ishin të pranishëm poete të Klubit të Shkrimtarëve “Petro Marko”, intelektualë dhe nxënës të talentuar në poezi, të cilët diskutuan mbi krijimtarinë dhe vlerat estetike të krijimtarisë së poetes, ndërsa recituan dhe vargje të përzgjedhura nga vëllimet e saj poetike.

Burimi ATSH

Lela Qejvani është cilësuar si poete e natyrës dhe e peizazhit.

Në një postim në rrjetet sociale, COD-i shkruan se, Qejvani shkon përtej imazheve piktoreske prej nga merr frymëzimin dhe spikat për thelbin e këndvështrimit të saj mbi temat sociale dhe atdhetare që trajton, si në vëllimet poetike “Mall përtej detit”, “Epokë lakuriqe”, “Ajo natë” edhe në librin publicistik “Në vorbullat e jetës”.

“Magjia e fjalës poetike” është një cikël takimesh letrare të organizuara nga Qendra për Hapje dhe Dialog me poete të këtij qyteti. Pjesë e kësaj “magjie” kanë qenë deri më tani Zamira Agalliu, Rudina Papajani, Fatbardha Amzaj etj.