Drejtoresha e Autoritetit për Informim mbi Dokumentet e ish-Sigurimit të Shtetit 1944-1991, Gentiana Sula priti në një takim në ambientet e Autoritetit përfaqësuesit e UNICEF Shqipëri, Murat Shahin dhe Anila Miria.

Sula tha se, gjatë takimit u zhvillua një diskutim i rëndësishëm mbi historinë tragjike të Kampit të Tepelenës, një kamp përqendrimi ku vuajtën fëmijë nga familjet e kundërshtarëve politikë.

“Këta fëmijë jetuan në kushte të rënda shëndetësore dhe sanitare, duke përjetuar kufizimin e lirisë pa një proces të drejtë”, u shpreh Sula.

Sipas saj, bashkëbisedimi u përqendrua në çështjet komplekse rreth drejtësisë për të miturit gjatë regjimit komunist, teksa theksoi nevojën për të kuptuar ideologjinë dhe praktikën sistemike, në mënyrë që të informohet për hapat e reformave të sotme.

Ambasadori Shahin shprehu interesin për të eksploruar bashkërisht me Autoritetin e Dosjeve, në dy komponentë kyçë të bashkëpunimit në të ardhmen. Konkretisht në thellimin e praktikave të mbrojtjes së fëmijëve, duke adresuar çështje si drejtësia për të miturit, diskriminimin ndaj fëmijëve të opozitës politike dhe pasojat e politikave pronataliste, ndër të tjera.

Komponenti i dytë lidhet me edukimin e të rinjve mbi këto kapituj të errët të historisë shqiptare, duke theksuar rëndësinë e analizës historike për parandalimin e shkeljeve të të drejtave në të ardhmen, dhe ka për qëllim konsolidimin e demokracisë dhe promovimin e paqes.

Gjatë këtij takimi, Sula vuri në dukje se, “ndërsa e kujtojmë të kaluarën, ne mbështetemi në veprat frymëzuese të UNICEF-it në mbarë globin”.

Burimi ATSH