Agjencia Shqiptare e Zhvillimit të Investimeve (AIDA) mbështeti 101 biznese mikro, të vogla dhe të mesme (SME) në sektorë të ndryshëm, duke nxitur kështu eksportet, inovacionin dhe duke mbështetur rritjen e sipërmarrjeve të drejtuara nga gratë.

Vlerat e granteve të përfituara variuan nga 800 mijë – 2,5 milionë lekë për ndërmarrje. Ato stimulojnë krijimin e vendeve të punës, nxisin shpirtin sipërmarrës dhe shërbejnë si themel i qëndrueshmërisë ekonomike.

Skemat mbështetëse për SME-të synojnë rritjen e konkurrueshmërisë së ndërmarrjeve, zhvillimin e produkteve dhe shërbimeve, inovacionin, rinovimin e teknologjisë, zhvillimin e artizanatin mbështetjen e grave sipërmarrëse, me qëllim nxitjen drejt eksportit dhe forcimin e aftësive të tyre lidhur me shërbimet dhe produktet për një treg të qëndrueshëm.

Fondi i posaçëm u shpërnda ndërmjet dy skemave, skemës për shpenzime korrekte dhe skemës për shpenzime kapitale.

Nga një numër i lartë aplikimesh arritën të përfitonin 54 aplikues për shpenzimet korrekte dhe 47 për shpenzime kapitale, ndër të cilët 60% ishin meshkuj dhe 40% femra.

Nga ana tjetër, 70% e fondit shkoi për sektorët e prodhimit, si industria e agropërpunimit, artizanati, industria e lehtë përpunuese, sektori i tekstileve dhe lëkurë-këpucët. Ndërsa 30% shkoi për sektorët e shërbimit, duke përfshirë BPO (Business Process Outsourcing; Shërbime të Jashtme për Menaxhimin e Proceseve të Biznesit), edukim, logjistikë, turizëm, etj.

Ministri për Ekonominë, Kulturën dhe Inovacionin, Blendi Gonxhja në një postim në rrjetet sociale theksoi se kjo është një mundësi e shkëlqyer për bizneset vendase duke u siguruar atyre fondet që iu nevojiten për t’i kthyer në realitet idetë e tyre novatore, si dhe krijon mundësi të kenë kapitalin që u nevojitet për të realizuar planet e tyre ambicioze.

Burimi ATSH