Presidenti Bajram Begaj uroi sot besimtarët ortodoksë shqiptarë nga Mitropolia e Beratit, ku u prit nga Hirësia e Tij, Asti dhe qytetarët ortodoksë beratas, që e pritën me “Këndimin e Kolendrave”, ose siç quhet në Berat, “Dalja e yllit”.

“Jemi mirënjohës për respektin dhe dashurinë që keni treguar çdo ditë tuajën si President për ortodoksët shqiptarë. Për mua, si Mitropolit i ri i Beratit, është kënaqësi e madhe t’Ju kem këtu!” – tha Mitropoliti i Beratit në fjalën e tij, drejtuar presidentit Begaj.

Presidenti Begaj u shpreh se “le të jetë kjo ditë një moment për të falënderuar Zotin për bekimet që kemi dhe për të ndihmuar ata që kanë më shumë nevojë. Të bashkuar, të mbështetur në vlerat tona të lashta dhe në shpirtin e pandarë të popullit tonë, ne mund të ndërtojmë një të ardhme më të ndritur për Shqipërinë”.

“Uroj që kjo Krishtlindje të sjellë gëzim dhe harmoni në çdo familje shqiptare, brenda dhe jashtë atdheut. Le të mbushemi me frymëzim për të përballuar të nesërmen me kurajë, dashuri dhe besim të plotë në potencialin tonë. Gëzuar Krishtlindjen! Paçi shëndet, paqe dhe lumturi në jetët tuaja!” – uroi Presidenti i Republikës Bajram Begaj.