Kryeministri Edi Rama u shpreh sot se përzgjedhja e Shqipërisë për nisjen e madhe të “Giro d’Italia” dëshmon se vendi ka një infrastrukturë moderne që nuk vë në dyshim cilësinë e garës.

I pranishëm në konferencën e prezantimit të “Giro d’Italia, që do të mbahet majin e ardhshëm në Shqipëri, kryeministri Rama u shpreh se për garën do të shfrytëzohet edhe Qafa e Llogorasë që ofron panoramat më të mahnitshme të bregdetit të Shqipërisë.

“Natyrisht që nuk ishte një diskutim i lehtë me administratorin e përgjithshëm të RCS Sport, Paolo Bellino edhe për faktin se ndërkohë vende të tjera kishin paraqitur më shpejt kandidaturën. Ndërkohë që ne na u desh ca kohë që të ishim në gjendje ta mbështesnim kërkesën edhe me fakte konkretet të infrastrukturës, të logjistikës, të mundësive të organizimit. Tanimë kemi një infrastrukturë moderne që me shumë mundim është ndërtuar në gjithë këto vite dhe që i jep të gjitha ato që ka nevojë “Giro d’Italia”, por duke mos vënë në dyshim cilësinë e garës. Do të shfrytëzohet edhe Qafa e Llogorasë e cila për shkak të tunelit tanimë frekuentohet nga shumë pak njerëz dhe ofron panoramat më të mahnitshme të bregdetit të Shqipërisë”, shtoi Rama.

Kryeministri nënvizoi rëndësinë nisjes së madhe të “Giro d’Italia” për promovimin e Shqipërisë.

“Në kërkim të nisjes së madhe në vendin e tyre janë shumë vende dhe ‘Giro d’Italia” është një garë që mund të krahasohet vetëm me ‘Formula 1’për sa i përket vizibilitetit të jashtëzakonshëm që ka. ‘Giro d’Italia’ jep mundësinë e një prezantimi global të peizazheve, të bukurive dhe forcës tërheqëse të vendit në aspektin sportiv”, tha Rama.

Për sa i përket Shqipërisë, Rama tha se “Giro d’Italia” është një rrugë e jashtëzakonshme për të çuar kartëvizitën e vendit në 3 ditë me radhë drejtpërdrejtë në 200 vende të botës dhe për t’ia prezantuar Shqipërinë mbi 800 milionë telespektatorëve.