Ambasadori i Mbretërisë së Bashkuar në Shqipëri, Nick Abbott mori pjesë sot në tryezën “Fuqizimi i Grave në Politikë: Sfidat, barrierat dhe zgjidhjet për Aksesin e Barabartë në Financat Politike dhe Dhunën me Bazë Gjinore në Politikë”, organizuar me nismën e Ambasadës britanike dhe të Prezencës së OSBE-së në Shqipëri.

Në fjalën e tij, ambasadori Abbot tha se “gratë duhet të kenë akses të barabartë në financat e partive politike, hapësirë të barabartë për t’u shprehur dhe marrë vendime, dhe ta bëjnë këtë pa pasur frikë nga dhuna gjinore apo sulmet publike”.

“Dua t’ju nxis që të shfrytëzoni aktivitete të tilla dhe duhen gjetur persona praktikë që t’ju ndihmojnë në situatën ku gjendeni. Jam mirënjohës që jam ndërmjet jush për të shprehur përkrahjen e Ambasadës britanike për fuqizimin e grave në politikë. Pjesëmarrja e grave në politikë është thelbësore në çdo demokraci, pasi gratë janë lënë mënjanë dhe penguar për shumë kohë”, theksoi Abbott.

Sipas ambasadorit Abbott, vetëm përfaqësimi nuk mjafton, pasi gratë dhe vajzat duhet të kenë ndikim të vërtetë dhe përfaqësim në të gjitha nivelet e qeverisjes.

“Të bësh politikë ka kosto të lartë. Rritja e financave për përkrahjen e grave është parakusht. Gjuha denigruese dhe stereotipat e gabuar i mbajnë gratë larg nga politika. Me anë të punës sonë ne duhet të synojmë të frymëzojmë ndryshimet që duhet të arrijmë. Ne mbështesim aktorët politikë dhe shoqërinë civile, që sjellin praktika dhe mekanizma që ndikojnë tek angazhimi i grave në politikë”, nënvizoi Abbott.

Ambasadori britanik bëri apel që partitë politike të bëjnë më shumë për gratë e angazhuara në to.

“Ju jeni në politikë për shkak të aftësive tuaja personale, jeni në politikë për shkak të asaj që keni kryer dhe dini të bëni. Kjo për mua është shumë e rëndësishme”, tha Abbott.

Burimi ATSH