Ministri për Europën dhe Punët e Jashtme, Igli Hasani çmoi sot rolin e Kartës A-5, ndërsa vuri në dukje se në kryesinë shqiptare gjatë vitit 2024 është përforcuar roli i saj, si një lojtar kyç në avancimin e aspiratave euroatlantike të rajonit.

Në cilësinë e kryesisë shqiptare për vitin 2024, Ministria për Evropën dhe Punët e Jashtme, mirëpriti sot takimin e Komisionit të Partneritetit të Kartës SHBA-Adriatike (A-5), që shënon dhe përfundimin e kryesisë shqiptare njëvjeçare të kësaj nisme.

Në fjalën e mbajtur me këtë rast, ministri Hasani vlerësoi se “ky forum ka dëshmuar vazhdimisht përvojën e tij si një platformë unike për bashkëpunim duke sjellë së bashku 5 vendet anëtare të Kartës A-5 dhe vendet vëzhguese.

“Teksa përfundon këtë vit kryesinë shqiptare, kam kënaqësinë të reflektoj për përparimet që kemi bërë dhe forcën e përpjekjeve tona kolektive. Dua të vlerësoj rolin e paçmuar të SHBA-së në mbështetje të demokracisë e stabilitetit në rajonin tonë. Ne e vlerësojmë partneritetin e tyre të vazhdueshëm”, tha Hasani.

Hasani mirëpriti po ashtu edhe pjesëmarrjen e vendeve vëzhguese si Kosova, Serbia dhe Sllovenia, që sipas tij, “ilustron frymën e hapjes dhe gjithëpërfshirjes së Kartës”.

“Është pikërisht kjo frymë që mbështet suksesin e bashkëpunimit tonë dhe forcon themelet e angazhimit tonë të përbashkët për paqen, stabilitetin dhe integrimin rajonal. Shpreh mirënjohjen time të sinqertë për të gjithë vendet anëtare dhe vëzhguese për kontributin e tyre gjatë këtij viti. Angazhimi juaj ka qenë i rëndësishëm në formësimin e një plani veprimi produktiv të kryesisë shqiptare për vitin 2024”, tha Hasani.

Hasani theksoi se “së bashku ne kemi përforcuar rolin e Kartës si një lojtar kyç në avancimin e aspiratave euroatlantike të rajonit tonë”.

Në takim ishin të ftuar përfaqësues të SHBA-së si dhe ministrat e vendeve të Kartës SHBA-Adriatike: Bosnjë-Hercegovina, Kroacia, Mali i Zi dhe Maqedonia e Veriut, si edhe vendeve vëzhguese: Kosova, Serbia dhe Sllovenia, me statusin e të ftuarit.

Burimi ATSH