Kryeministri Edi Rama bëri të ditur sot se po punohet aktualisht që Prokurimet Publike të çohen në një nivel tjetër përmes Inteligjencës Artificiale.

Në takimin e nivelit të lartë ”Shqipëria 2030 në BE-Rruga e reformave”, të organizuar nga Kuvendi Rama theksoi se “integritetin e procesit të Prokurimeve Publike do ta bëjmë aq të fortë sa që vendet e BE-së të duan që ta marrin modelin tonë dhe ta implementojnë se teknologjia ta jep këtë mundësi. Pashë edhe Eurobarometrin që kishte bërë një anketim për perceptimin e korrupsionit nga popujt e BE dhe ishin një numër i madh popujsh në BE që kishin idenë që qeveritë e tyre dhe vendet e tyre ishin më shumë të korruptuara sesa mendon populli shqiptar për qeverinë dhe vendin tonë”.

Kryeministri Rama u shpreh se “teknologjia na jep mundësinë që ne të bëjmë kapërcime të cilat luftojnë me perceptimin. Natyrisht ky perceptim lidhet me shumë gjëra, por jo me faktet dhe me të gjitha faktet. Kjo është e vërteta”.

“Ashtu sikundër ne po përgatisim, ministrja e Shtetit për Administratën Publike dhe Antikorrupsionin Adea me mbështetjen e të gjithëve, ne po përgatisim dhe së shpejti do ta prezantojmë një faqe të Shqipërisë transparente, e cila do të jetë një risi nga pikëpamja e hedhjes në dritë të gjithë aktivitetit të çdo gjëje që ndodh dhe bëhet dhe çdo qindarke që prokurohet apo shpenzohet në Republikën e Shqipërisë sa na takon ne si pushtet ekzekutiv se jemi të vetëdijshëm se gjërat për t’u bërë janë shumë”, tha Rama.