Në 28 Nëntor 1912, Shqipëria shpalli Pavarësinë e saj.

Më 28 Nëntor 1912, përfaqësues nga të gjitha krahinat shqiptare me në krye Ismail Qemal Bej Vlorën, ngritën Flamurin Kombëtar në Vlorë, duke shpallur Pavarësinë e Shqipërisë nga Perandoria Osmane. Pas afro pesë shekujsh pushtimi, ky akt historik çliroi vendin duke i hapur rrugë ndërtimit të shtetit të pavarur dhe institucioneve kombëtare, përfshirë strukturat monetare dhe bankare.

Pas shpalljes së Pavarësisë së Shtetit Shqiptar, një nga kujdeset parësore të qeverisë shqiptare të kryesuar nga Ismail Qemal Bej Vlora ishte ngritja e një banke emetimi dhe krediti në Shqipëri, e cila ta zhvillonte veprimtarinë në përputhje me normat e bankave kombëtare të shteteve evropiane. Ismail Qemali e konceptonte Bankën Kombëtare si institucion financiar, i cili duhej të synonte në radhë të parë zhvillimin ekonomik të vendit, kurse fitimin ta realizonte nëpërmjet zhvillimit ekonomik dhe stabilizimit të shtetit të pavarur shqiptar. Jo më kot, bankën kombëtare të themeluar një vit pas pavarësisë, ai e ka cilësuar si “…e dyta fitore pas lirisë”.

Në përkujtim të kësaj dite të lavdishme, në vitin 2012, Banka e Shqipërisë emetoi serinë e monedhave përkujtimore me tematikë “100-vjetori i Shpalljes së Pavarësisë”, të cilat përmbajnë simbole të kësaj ngjarjeje historike: portretin e Ismail Qemalit, Deklaratën e Shpalljes së Pavarësisë, shqiponjën dykrenare të flamurit të ngritur më 28 Nëntor 1912 dhe dy duar të bashkuara, simbol i Besëlidhjes Shqiptare të vitit 1878.

BSH-ja njofton se, monedhat janë të disponueshme për shitje në Dyqanin e Muzeut të Bankës së Shqipërisë.

(ATSH)